5 rooftogte in KwaNonqaba
Die polisie op KwaNonqaba het deurnag gewerk om leidrade op te volg nadat vyf gewapende rooftogte, in slegs vier dae, in dié gebied op Mosselbaai plaasgevind het.
Vier van die voorvalle het kort na mekaar gebeur en is binne 'n tydperk van 48-uur aangemeld. Dit blyk dat veral spazawinkels deurgeloop het. Die mees onlangse voorval het op Saterdagaand, 4 Julie by die
Sevens Shop in Adriaansrylaan plaasgevind. Volgens die polisie het drie gewapende mans die winkel van minstens R8 000 in kontant beroof en ook ‘n werknemer se selfoon gesteel.
Dié rooftog volg kort op die hakke van nóg ‘n voorval op dieselfde dag in Adriaansrylaan toe ‘n man en vrou wat 'n kontantleningsbesigheid bedryf, van duisende rand se kontant beroof is. Die slagoffers het om 08:00 voor hul besigheid gestop toe hulle deur drie gewapende mans oorval is.
Die verdagtes het die slagoffers met 9mm-pistole gedreig en hulle op hul knieë gedwing. Hulle het 'n sak met kontant en 'n skootrekenaar ter waarde van R15 000 by die slagoffers afgeneem waarna hulle te voet gevlug het.
Verlede Woensdag is skote afgevuur en ‘n spazawinkel beroof en op Vrydag, 3 Julie is nóg ‘n spazawinkel beroof, asook ‘n vragmotor wat brood vervoer. Tydens al hierdie voorvalle, was die verdagtes met vuurwapens en messe gewapen.
Polisie bedank gemeenskap
Polisiewoordvoerder, sers Kappie Kapp sê dat een verdagte intussen op Maandag, 6 Julie om 04:00 in hegtenis geneem is. "Ons volg steeds leidrade op, maar ons vermoed dieselfde mense is by al die voorvalle betrokke."
Die polisie bedank die gemeenskap vir hul samewerking en wenke om die verdagte in hegtenis te neem, maar versoek ook dat inwoners nie agter misdadigers moet aanhardloop nie. "In die een voorval het inwoners agter die gewapende mans aangehardloop en skote is afgevuur. Niemand is beseer nie, maar ons vra inwoners om eerder die polisie te kontak, anders sit ons volgende met 'n moordsaak ook."
Enigeen met inligting word versoek om die ondersoekbeampte in die saak te kontak (079 893 9947) of die KwaNonqaba-polisiestasie se speurhoof, kapt Ashley Michaels (082 334 7566).
‘Ons volg steeds leidrade op, maar ons vermoed dieselfde mense is by al die voorvalle betrokke.’