Ouma Lena se huis verwelkom die ysterperde
Om al die aktiwiteite van 'n organisasie soos Ouma Lena se huis in Melkhoutfontein aan die gang te hou, is nie maklik nie. Wanneer sakke vol baba- en kinderklere asook kos afgelewer word en dit boonop op blink, brullende motorfietse, loop Jenny Olivier en haar span se bekers oor.
Ongeveer 20 motorfietsryers van so ver as Bredasdorp het Saterdagoggend, 4 Julie die dorp tot groot vreugde van grootoog omstanders binnegedreun, om dié welkome skenkings aan Ouma Lena se huis te oorhandig.
Die geleentheid was die inisiatief van die Christelike uitsaaistasie, Gateway Radio, wat met die Hessequa bikers for kids-groep saamgespan het. Sally Nicholls van Gateway Radio sê hulle het onlangs eers van Ouma Lena se huis en die groot rol wat dit in die Melkhoutfonteingemeenskap vervul, bewus geword. Hulle het toe begin kinderklere insamel. "Baie van die klere is deur vroue van Witsand en Heidelberg gebrei." Die grootste hoeveelheid breiware kom egter uit
Engeland. "Gateway-ondersteuners Mike en Elaine Cox van Albertinia het gesorg dat babaklere wat deur die craft tea ladies van die St Johns Anglikaanse Kerk in Egham gebrei is, na Suid-Afrika gestuur word."
Nicholls het Corrie van der Westhuizen van Hessequa bikers for kids genader om in die aflewering te deel en die motorfietsryers het op hul beurt 'n hele klompie kos bygedra.
In haar bedanking het Olivier gesê die aktiwiteite wat in en deur Ouma Lena se huis aangebied word, bou 'n brug tussen gemeenskappe. Hulle werk nou saam met Badisa en talle vrywilligers gee hul tyd en talente om die kleuterskool, sopkombuis en meer te bedryf.
Haar entoesiasme vir toekomsplanne was só aansteeklik dat die motorfietsryers daar en dan begin planne maak het om met verdere projekte te help.