Kla by die regte plek
Wat kan iemand se motief wees om ‘n anonieme brief aan SuidKaap Forum te stuur om inligting by hulle te kry oor wat nou eintlik in DROOM se tehuise aangaan? '‘n Personeellid van DROOM is positief getoets vir Covid-19 – wat gaan aan?'
Ek is jammer as ek verkeerd is, maar was die logiese handeling nie om by DROOM self uit te vind wat die ware toedrag van sake is nie? Die anonieme persoon se familielede is tog in DROOM se tehuise en nie iewers in die koerant se kantoor nie?
Personeel wat op dieselfde skof gewerk het as die persoon wat positief getoets het, is vir twee weke op self-isolasie geplaas en personeel wat met vakansie was, is teruggeroep om in daardie persone se plekke te werk. ‘n Opoffering wat hulle tot nou, met liefde doen.
Bekommerde anonieme persoon, het u al daaraan gedink wat sal gebeur as DROOM se verpleegpersoneel, soos by ‘n tehuis op ‘n plattelandse dorpie in die Noord-Kaap, ook nie kans sien om hulself en hul gesinne langer in gevaar te stel nie en weier om te kom werk? Sal u kom help om die familielede oor wie u so bekommerd is, te versorg - onthou net dit sal, onder andere, beteken dat u ‘n volwasse persoon se doek sal moet ruil.
Op hierdie stadium is dit net Tehuis Ou Meule wat geraak word deur die positiewe Covid-19toetsuitslag van ‘n personeellid. Elke tehuis het hul eie personeel, met ander woorde personeel werk nie oor-en-weer by beide tehuise nie.
Genoeg van "anoniem" - die ongelukkige gebeurtenis het ook ‘n ander kant. DROOM is oorweldig deur boodskappe van ondersteuning en dankbaarheid vir wat DROOM onder uiters ongewone en uitdagende omstandighede vir inwoners van die tehuise doen. Van ons kant sê ons baie dankie vir die betrokkenheid en hulp van die Jordaans en Beyers, Hessequamunisipaliteit wat hul brandweeren gesondheidsafdeling insluit en by name burgemeester Grant Riddles, departement gesondheid, privaat- en staatsdokters en die hele gemeenskap van Riversdal en omgewing.
Dankie aan elke verantwoordelike verteenwoordiger, kinders, familie en vriende van die inwoners vir u begrip en ondersteuning. Dankie vir elke gebed - hou asseblief aan om vir ons personeel en inwoners te bid, ons het dit steeds baie nodig alleen het ons nie ‘n kans teen die nare virus nie.
Ons wil veral dankie sê vir ons aardse engele, ons verpleegpersoneel. Ons waardeer die opofferings wat julle maak. Eendag, ons weet nie wanneer nie, gaan julle aardse status verander na hemelse engele.
Dankie Suid-Kaap Forum dat julle die vorige week “anoniem” se brief onder ons aandag gebring het en dankie vir die geleentheid dat mnr Veldsman die ware toedrag van sake kon verduidelik.
DROOMgroete.