Walvis is suksesvol van strand verwyder
Die karkas van 'n spermwalvis wat vir weke langs die Jongensfontein-kus gedryf en later op die rotse beland het, is verwyder.
Hessequa-munisipaliteit het
Vrydag, 18 September omstreeks
08:30 met die verwydering van die gestrande walviskarkas begin. ‘n Inligtingsessie onder leiding van
Craig Viljoen van die Incident Working Group Africa (IWGA) is gedoen voor die proses 'n aanvang geneem het.
IWGA is deur die munisipaliteit aangestel om die verwyderingsproses te koördineer en te bestuur, insluitend die rehabilitasie van die terrein en toegangspad wat gebruik word.
DMO Blasting is aangestel vir die beheerde aftakeling van die karkas deur middel van plofstof en LHM-verspreiders vir die beheerde aftakeling deur middel van meganiese toerusting.
Nadat die karkas opgeblaas is, is die meganiese toerusting na die perseel verskuif en die karkas verwyder. Dit is op Melkhoutfontein-stortingsterrein verwyder. “Die verwydering is op so 'n manier gedoen dat dit geen bedreiging of gesondheidsrisiko vir die gemeenskap van Melkhoutfontein inhou nie,” het Didi Budricks, kommunikasiebeampte van die munisipaliteit gesê.
Volgens Budricks het die kontrakteur begin met die rehabilitasie van die terrein. Die proses sluit in die aanplant van inheemse plantegroei op ‘n klein gedeelte waar die meganiese laaigraaf werksaam was.
“Vetterige oorblyfsels wat op die rotsagtige oewer lê sal natuurlik verminder. Die oorblyfsels strek verder as die Jongensfonteinkaravaanpark,” het sy bygevoeg. Volgens Budricks sou dit reeds teen Woensdag, 23 September genormaliseer het.