Groot toeloop van toeriste word op vlak 1 verwag
Hessequa-munisipaliteit is positief dat met die beweging na vlak 1 van inperking, toerisme binne die streek 'n drastiese toename sal toon.
Deon Lewis, bestuurder regsdienste en administrasie by die munisipaliteit het Maandag, 21 September gesê met vlak 1 en internasionale vlugte wat weer vanaf Donderdag, 1 Oktober die land mag invlieg, verwag hulle dat wildplase, wynkelders en strande hoofsaaklik meer aftrek sal geniet onder reisende oorsese besoekers.
"Die Tuinroete-streek, waarvan die Hessequa-omgewing deel vorm, is 'n gewilde bestemming vir reisigers vanaf Duitsland, Nederland en die Verenigde Koninkryk. Met die vooruitsig om hierdie reisigers weer te akkommodeer, verwelkom Hessequatoerisme die aankondiging dat internasionale grense stelselmatig geopen word," sê hy.
Volgens Lewis het besprekings en navrae vir akkommodasie by plaaslike karavaanparke die afgelope twee weke skerp toegeneem. "Al Jongensfontein en Preekstoel se selfsorgeenhede vir die komende naweek is vol bespreek en die chalets by Ellensrustkaravaanpark is 80% vol bespreek. Jongensfontein-karavaanpark se staanplekke is ook 70% vol bespreek."
Lewis sê besprekings vir die Oktober en Desember skoolvakansies lyk ook belowend. "Dit is primêr besoekers vanuit die WesKaap wat ons karavaanparke gedurende die buiteseisoen besoek." Hy het Hessequa as 'n paradys met natuurskoon, 'n goeie padnetwerk, skoon strande en 'n diverse aanbieding van aktiwiteite, wat altyd ‘n gewilde trekplesier vir reisigers is, beskryf.
"Die verbod op inter-provinsiale reis het 'n beduidende negatiewe ekonomiese impak op die plaaslike toerisme sektor gehad, met tot 90% van alle besoekers in Hessequa wat hoofsaaklik vanaf die provinsies Wes-Kaap, Gauteng en Oos-Kaap afkomstig is. Hierdie verbod het teweeggebring dat Hessequa en die plaaslike rolspelers se fokus na die onmiddellike omgewing verskuif het, met verwyssing na reisigers van die Wes-Kaap wat na onverkende natuurskoon en 'n rustige omgewing opsoek is," verduidelik Lewis.
Volgens hom het die Augustus langnaweek baie voete na die streek gelok. "Vulstasies was weer besig, baie akkommodasie-eenhede was vol bespreek en restaurante kon weer 'n volle dag se sessies akkommodeer met die aanbieding van ontbyt, middagete en aandetes. Hierdie tendens is steeds sigbaar oor naweke, met meer besoekers wie ons omgewing verken," sê hy.
Met 'n besoek aan Stilbaai en omgewing het Magreet Wilbers by die plaaslike vismark Saterdag, 19 September op die hawe aan Suid-Kaap Forum gesê hulle beleef reeds 'n besiger seisoen as dieselfde tyd vorige jare. "Toeriste is volop en koop vis aan soos die bote inkom," sê Wilbers.
Vir toerismebesprekings en navrae kan die publiek die munisipaliteit kontak by 028 713 8000.
‘Die Tuinroete-streek, waarvan die Hessequa-omgewing deel vorm, is ‘n gewilde bestemming vir reisigers vanaf Duitsland, Nederland en die Verenigde Koninkryk.’