Buurtwagte belangrik in misdaadvoorkoming
Die Hessequa buurt- en plaaswagte het Donderdag, 17 September in samewerking met Riversdal-polisie ’n vermeende inbreker in hegtenis geneem.
Die polisie het Johan Crous, veiligheidsvoorsitter van die Hessequabuurtwag die oggend om hulp genader nadat ’n soektog in die Brandrivieromgewing na 'n verdagte die vorige dag onsuksesvol was. Crous het die Albertinia- en die Riversdal-buurtwag se reaksiespanne ontbied om aan die soektog deel te neem. Een van AfriForum se hommeltuie is ook ontplooi.
Die verdagte is verskeie kere opgemerk, maar hy kon weens die ruwe, uitgestrekte terrein elke keer weer verdwyn. Teen skemer het die polisie onttrek, hoewel lede van die AfriForum-reaksiespanne agtergebly het. Die verdagte het teen vroegaand weer sy verskyning gemaak en is deur die reaksiespanne in hegtenis geneem en aan die polisie oorhandig.
Die buurt- en plaaswagte het ook Vrydag, 18 September aan die nasionale massapatrollie deelgeneem wat regoor die land deur AfriForum se veiligheidstrukture aangepak is.
Die massapatrollies word verskeie kere deur die loop van die jaar aangebied en die doel is om die waarde van proaktiewe deelname aan gebiedsbeskerming aan gemeenskappe uit te lig. ’n Boodskap word ook aan misdadigers gestuur dat gewone burgers nie kriminele aktiwiteite duld nie en self sal inspring om die polisie en ander rolspelers in die stryd teen misdaad in gemeenskappe by te staan. Lede van die Riversdal Sentraal- en Aalwynfleur-buurtwagte, asook die Albertinia-plaaswag was betrokke. ’n Gesamentlike operasionele sentrum is op die been gebring by die NG Kerk Moedergemeente se kerksaal. Dit is deur vrywilligers beman en die massapatrollie is ook daarvandaan gekoördineer. Die polisie was ook hierby betrokke. Die patrollie het omstreeks 18:00 afgeskop en tot 04:00 Saterdagoggend geduur. voorsitter van die Albertiniaplaaswag was aan die stuur van sake gewees. “Dit was weer eens ’n riem onder die hart om te sien hoe ons lede hand opsteek om hul deel te doen wanneer daarvoor gevra word. Ons wil almal veilig wees en ook daardie veiligheid vir ons gesinne bied. Daarom is hierdie tipe aksies so belangrik. ’n Woord van dank aan elkeen wat deelgeneem het, ook aan ons plaaslike polisie vir hul ondersteuning. Selfs die speaker, Andrew Stroebel was daar om ons sterkte toe toe te wens en te bedank vir ons volgehoue steun teen misdaad," sê Crous.
Raak vandag nog by AfriForum se Hessekwa-tak betrokke: SMS “Hessekwa” na 45342 (R1).