Onvolledige inligting skep wanindruk
In Suid-Kaap Forum van 10 September het die advertensie ten opsigte van die Bessiestraat eiendomsontwikkeling in Stilbaai verskyn. Die foto, wat slegs ter illustrasie deur die dorpsbeplanner gebruik is, skep egter ‘n skewe beeld van wat presies beplan word en hoe dit moontlik gaan lyk.
Die storm wat tans op Facebook woed is gebaseer op onvolledige inligting en spoke wat opgejaag word deur goedbedoelende, maar oningeligte mense. Die uiteindelike ontwikkeling sal heel anders wees as wat deur hierdie mense voorgehou word.
In kort, die ontwikkeling wat beplan word is vir 52 wooneenhede, 12 drie- en 26 twee slaapkamer luukse wooneenhede, plus 14 twee slaapkamerwoonstelle meestal met twee badkamers elk.
Die eerste fase word beplan vir 6 drie slaapkamer en 13 twee slaapkamer, twee badkamer tuineenhede, met 7 twee slaapkamer en twee badkamer woonstelle. Die beoogde pryse sal wissel tussen R1,2 en R1,6 miljoen elk. Sonkrag en waterherwinning sal ook ingebou word.
Uit voorgaande kan duidelik gesien word dat hierdie geen ekonomiese agterplaas ontwikkeling sal wees nie. Dit sal dit moontlik maak vir enkellopendes, klein en jong families om ook ‘n plek in Stilbaai te kan beskostig. Erfpryse in Stilbaai het gestyg tot vlakke waar selfs ‘n klein huisie se boukoste die totale prys opstoot tot die R2 miljoen vlak.
Deur ‘n ontwikkeling soos hierdie te verhoed sal beteken dat pensionarisse en klein jong gesinne nie meer sal kan bekostig om in Stilbaai te kom woon nie. Is dit in belang van die breër publiek?