Jerusalema met die #Imagine-groep
Die Jerusalema-danskoors het behoorlik in die Hessequa-streek posgevat en ook die #Imagine-groep het besluit om die passies aan te leer.
Dié groep het Saterdag, 19 September in die parkeerterrein voor die getypoel in Gouritsmond hul slag gewys.
“Ons het die Jeusalema gedoen omdat ons dit goedgedink het om as ‘n span iets saam te doen. Die dans is iets lekkers vir die kinders,” vertel Glaudine Gordon.
Die #Imagine-netwerk is in 2013 deur ‘n groep tienerbedieningsleiers begin om geskikte modelle vir tienerbediening te bespreek en te ontwikkel. Sedertdien het die netwerk tot ‘n nasionale beweging gegroei wat uit honderde kerke in verskillende denominasies en kulturele agtergronde regoor Suid-Afrika bestaan.
In 2016 het die netwerk ‘n maatskappy sonder winsoogmerk, die Imagine Youth Movement geregistreer as die regspersoon van die projekte en programme binne die beweging. ‘n Raad van direkteure, bestaande uit bedieningsleiers binne die beweging bied strategiese en organisatoriese leierskap. Die direksie is almal voltydse bedieningsleiers.
“Aangesien ons as ‘n netwerkorganisasie begin het, word baie projekte en programme deur ander regspersone aangebied, onder toesig van die nasionale uitvoerende komitee,” verduidelik Melanie Pretorius.
“Die kinders het Desember verlede jaar by die Fynbos Fees ‘n stalletjie gehad en goedjies verkoop om geld in te samel om in Maart te gaan kamp, maar ons moes dit as gevolg van die Covid-19 inperking kanselleer. Toe vlak 2 aangekondig word kon hulle uiteindelik die kamp bywoon, wat uiters suksesvol was omdat hulle ook geestelik gegroei het.”
Volgens Gordon het sy nie geweet wat #Imagine is toe sy die eerste keer daarvan gehoor het nie, maar toe sy dit saam met die jeug ervaar het, was dit iets besonders. “Dit bring die kinders saam, ongeag wie jy is of waarvandaan jy kom. Saam kan ons berge versit.”
Sy verduidelik dat hulle twee groepe in Bitouville is, naamlik die Cuppa Girls wat uit meisies bestaan en die Tien Ten uit seuns. Danksy Pretorius het die twee groepe saamgesmelt. “# Imagine is vir ons ‘n bysaak wat eenkeer in die jaar is.”