Dogter op soek na haar ma
“Help my om my ma te vind sodat haar eerste en enigste kleinkind, sowel as ekself amptelik ons geboortereg kan opeis,” is die pleidooi van ’n jong ma van Heidelberg.
Die 18-jarige Jo-Ann Plaatjies is angstig op soek na haar ma, Andelize Davids (33), beter bekend as Niesie. Sy was ’n nooi Plaatjies.
Volgens Jo-Ann het sy nog Oktober verlede jaar kontak met haar ma gehad voor laasgenoemde uit die dorp is, op soek na werk. Andelize bevind haar glo iewers op ’n plaas in die Montagu-, Ashtondistrik. Sy benodig haar ma om haar geboortesertifikaat by haar te kry, asook om aansoek te doen vir haar 11 maandoue baba se geboortesertifikaat. Haar ma het ’n paar jaar gelede in Kaapstad gaan werk en het Jo-Ann se geboortesertifikaat glo daar agtergelaat.
“Ek is werkloos en kan nie aan al my kind se behoeftes omsien nie. Ek wil vir 'n kindertoelaag aansoek doen sodat ek beter vir my kind kan sorg,” sê sy hartseer.
Sy noem dat haar ma se broer, Derek-John Plaatjies vertel dat hy haar laas op die plaas Rietvlei 2 in Montagu gesien het waar sy met riete gewerk het. Volgens hom het sy ook op ’n stadium by mense in Talliestraat, Rondomskrik op Barrydale gebly.
“Mammie, kom net asseblief terug huistoe sodat ek vir my identiteitsdokument en WayLeigh se geboortesertifikaat kan aansoek doen.”
Enigiemand wat weet waar Andelize haar bevind, kan Johnique Smith (071 333 4564) of Clive Pretorius (073 332 8992) skakel, of 'n e-pos rig aan pretoriusclive@gmail.com