Pedofiel vra weer borg
‘n Man van Stilbaai wat daarvan aangekla word dat hy seksdade met twee minderjariges gepleeg het, sal vandag, 16 Oktober vir die sesde keer in die Stilbaai-streekhof probeer om op borg vrygelaat te word.
Die vermeende pedofiel staan tereg op twee klagtes, waar hy na bewering oor ‘n tydperk van drie jaar seksdade met twee kinders van onderskeidelik agt en 10 jaar oud sou gepleeg het na hy hulle vertroue gewen het.
Sy borgaansoek is Vrydag, 9 Oktober na 16
Oktober uitgestel.
Suid-Kaapse polisiewoordvoerder, kaptein Malcolm Pojie het weereens benadruk dat nog soortgelyke klagtes teen die beskuldigde aanhangig gemaak kan word. Hy sê deel van die ondersoek is dat die beskuldigde nóg kinders se vertroue gewen en seksdade met hulle gepleeg het.
“Soos die verhoor verloop verwag ons dat nog slagoffers na vore sal kom. Die ondersoek is in ‘n sensitiewe stadium en kan ons nie nou meer besonderhede bekend maak nie.”