Polisie verskerp optrede

Met die feesseisoen om die draai staan die polisie bont om misdadigers vas te trek.

Riversdal se polisiekommunikasiebeampte, konstabel Venia Daries waarsku dat booswigte besig is om hul kriminele voornemens tot aksie uit te voer.

Huishoudelike geweld wek ook kommer by die polisie. Daries rig ‘n dringende versoek om konflik op ‘n vreedsame manier op te los in plaas daarvan om handgemeen te raak, wat mense agter tralies kan laat beland. Sy vra dat mense pro-aktief moet optree om misdaad te voorkom en bekamp.

Van die misdrywe wat besig is om hoër syfers te toon, is diefstal uit motorvoertuie, aanranding en internetbedrog. “Ons ondervind ook ‘n toename in diefstal vanaf motors. Dit is veral motorbatterye wat gesteel word. Die gemeenskap moet sorg dat hulle voertuie gesluit en vensters toe is wanneer dit geparkeer word en om nie waardevolle items te laat rondlê nie." sê Daries.

Daar is ook ‘n toename in aanranding op hawelose mense. "Ons gaan streng optree teen diegene wat hulle skuldig maak aan sulke aanrandings," waarsku Daries.

Die polisie kry ook meer klagtes oor verdagte mense en voertuie wat in die sakekern, sowel as woongebiede van Riversdal rondbeweeg.

Die gemeenskap word gemaan om by kitsbanke op hul hoede te wees.