Totsiens ou pont, hallo nuwe pont
Die nuwe Malgas-pont wat die plek van die oue ingeneem het, is gedurende die eerste week van Oktober in werking gestel.
Die ou pont, wat vir jare ‘n baken op Malgas was, is op 24 Junie vanjaar uit die water gehaal. Volgens Swellendam se burgemeester, Nicholas Myburgh, was veiligheid die hoofoorweging hiervoor gewees. Die ou pont was die enigste in die land wat nog met mannekrag bedryf is. Dit is vervang met ‘n nuwe gemotoriseerde pont, dubbel die grootte van die oue. Die nuwe pont is 17,075 m lank, 6 m breed en kan 20 ton dra, wat dit geskik maak vir die vervoer van groot plaasimplemente, toeristebusse, passasiersvoertuie en ligte afleweringsvoertuie.
Selfs die petisie wat op Facebook begin en blykbaar deur meer as 21 000 mense onderteken is, kon nie die vervanging van die ou pont keer nie. Myburgh, wat self die petisie begin het, het gesê dat die pont in die Overberg so deel van die erfenis soos biltong, rooiwyn of ‘n naweekbraai is. Hy het aangevoer dat die pont ‘n belangrike toerisme-aantreklikheid is en die omgewing se uniekheid beklemtoon.
Jandré Bakker, kommunikasiehoof van die departement van vervoer het gesê dat die besluit om die ou pont te vervang nie ligtelik geneem is nie. Volgens hom was veiligheid van diegene wat die ou pont bedryf en gebruik daarvan die belangrikste oorweging. Die Suid-Afrikaanse Maritieme Veiligheidsorganisasie het immers in ‘n onafhanklike ondersoek bevind dat die ou pont en die staalkabel waarmee dit oor die rivier getrek word, ‘n gevaar inhou.
“Dit sal tot voordeel van toerisme strek omdat die veilige nuwe pont aan internasionale standaarde voldoen en kosteloos tot gebruikers se beskikking gestel sal word.”