Reën bring meer vreugde as kommer
Sommige boere juig oor reën wat tussen Donderdag, 1 en Sondag, 11 Oktober oor die Hessequa-streek neergesak het, terwyl ander met kommer hul oeste dophou.
Boere het tussen 70 en 80mm water uit hul reënmeter gegooi. In die Langebergheuwels is plek-plek tot net oor die 100mm reën in dié tydperk gemeet, met tot 60mm reën wat binne drie dae, (Vrydag, 9 tot Sondag, 11 Oktober) op die hoërliggende landbougebiede geval het.
Saggie van As, voorsitter van die Korentepoort-Vetterivierbesproeingsraad sê weidingsboere juig, maar garsboere kan moontlik hul oeste verloor met die korrels wat gaan oopbars voor hulle kan snoei. Hierdie gars sal dan as weiding aangewend moet word. Hy sê die gars is nog te nat om te snoei. Van As is egter van mening dat die reën meer voordelig as nadelig is.
Louis van Dyk, bestuurder van die besproeingsraad sê die feit dat die Korentepoort sy wal oorstroom, beteken dat daar vir tot twee komende seisoene genoegsame water is. Hy waarsku egter dat die weersomstandighede onvoorspelbaar is en die situasie in ‘n oogwink kan verander.
Mike en Lettie Murray het in die landbougebied naby die Langeberge gaan rondstap toe die reën bedaar. Lettie beskryf die prag van die veld as ongelooflik.
Bronwyn Minnie sê sy het Sondag 44mm reën in Riversdal se middedorp gemeet, terwyl Dawn Coertze Nel Sondag 56mm reën op Klipfontein, in die Albertiniaomgewing gemeet het. Op dieselfde dag het Danwil Platjies 45mm reën by die Vetkragga-boerdery in sy reënmeter gehad.