Slaan ag op ons erfgoed
Ons Gourikwa Khoisan-stamhuis wag nog vir konsultering met ons, hier adverteer u hulle al om grond te verkoop.
Ons versoek konsultering met ons en ander betrokke stakeholders soos Greenhaven Besigheidsforum en andere. Hierdie grond het sentimentele en historiese waarde vir ons. Hierdie is kultuur erfenisgrond en nalatenskap.
Op hierdie betrokke grond was ons skool, rugby, atletiek, krieket, tennisbaan. Trouens, die skool staan nog daar. Hierdie is afgeneem van ons deur die destydse Apartheidswetgewing en as verklaring van sogenaamde blanke gebied.
By verskeie gemeenskapsvergaderings was hierdie saak al opgehaal, asook ander terreine. ‘n Versoek is ook na Boltons gerig om ons erfenis terug te gee. Hierdie, asook ander terreine is ons Erfenisterreine en moet terugkom na ons toe soos in die geval van Distrik 6 nou gebeur. Mense het versugtinge en verlange na ons erfenis. Stories, foto’s, heimwee en hunkering daarna kan getuig.
Ons is nie teen ontwikkeling as sulks nie, maar hierdie is harts- of bloedgrond. Hierdie aksie is ‘n baie groot struikelblok tot nasiebou en eenhorigheid in ons dorp. Erken ons in hierdie saak. Kom praat met ons as diep verontregtes oor hierdie grond. Haatgevoelens kan nou verder aangeblaas en aangevuur word.
Hierdie bitter beker van ons laat nou nog ‘n wrang smaak in ons mond. Kom reik uit na ons vir harmonie.
Ek het verlede week die Voortrekkermonument gaan besoek en dit het my diep geraak oor die trots en kultuur van ander volkere vir hul geskiedenis.
Kom word brugbouers en nie afbrekers daarvan nie. Die haas van ontslae raak van kultuurhistoriese grond laat vraagtekens.
Die kwessie van grondbesit deur inheemse stamme, veral in die Mosselbaai-munisipale gebied, is uiters belangrik vir die plaaslike owerheid en word met die nodige oorsig en deursigtigheid hanteer. Sou dit tot die munisipaliteit se aandag kom dat daar moontlik ‘n grondeis op enige van die stukke grond ter sprake is, word die Grondeise Kommissie genader om dit te bevestig al dan nie.
Indien daar wel gerigestreerde eise is, word daar nie voortgegaan met die saak nie tot die eis afgehandel is.
Meneer Jacobs, of trouens enige ander verteenwoordiger van Gourikwa Khoisanstamhuis, is welkom om die nodige bewyse van grondbesit of geregistreede grondeise aan die munisipaliteit voor te hou.
Enige ander kommentare rakende die moontlike verkoop van grond deur die munisipaliteit kan ook soos per kennisgewings in die plaaslike media ingedien word. Alle kommentare en besware word aan die raad vir ‘n finale besluit voorgehou.