Oorlaaide HealthNET vra hulp
HealthNET (Health Non-Emergency Transport) het ‘n beroep op die gemeenskap gedoen om te help met die vervoer van pasiënte tussen hospitale en van wonings na hospitale en terug.
Deanna Bessick, kommunikasiebeampte vir die Wes-Kaapse mediese nooddienste en forensiese patologiese dienste, het bevestig dat die diens onder druk is.
Bessick se versoek om hulp met vervoer volg na verskeie klagtes van nienoodpasiënte wat soggens vroeg en saans laat te voet ver afstande moet aflê.
“Ons doen ‘n beroep op pasiënte wat gesond en sterk genoeg is om met privaatvoertuie na en van hospitale geneem te word, om nie op ‘n reeds oorlaaide HealthNET-diens te vertrou nie,” het Bessick gesê.
“Pasiënte word bespreek met behulp van ‘n aanlynstelsel wat verseker dat sitplekke regverdig toegeken word. Besprekings kan slegs deur ‘n provinsiale gesondheidsorgfasiliteit (hospitaal/kliniek) gedoen word en pasiënte ontvang ‘n verwysingsnommer en datum.
“Pasiënte wat te siek is, moenie deur HealthNET vervoer word nie.” het Bessick gevra.