In die kol met draf en skiet
Oudtshoorn het verlede Sondag die eerste laserrun-byeenkoms sedert inperking by die De Jager-sportkompleks aangebied.
Laserrun is ‘n kombinasie van hardloop en laser-pistoolskiet wat bestaan uit drie of vier rondes, afhangend van die atleet se ouderdom. Die afstand waarvan geskiet word en die afstand wat gehardloop word hang dus af van die ouderdom van die atleet. Dit wissel van 5 m tot 10 m by die skiet, en die hardloop bestaan uit afstande van 400 m tot 800 m per ronde.
Volgens Bart Saaiman, een van die organiseerders, was dit duidelik dat die atlete van George, Mosselbaai en Oudtshoorn die saamwees terdeë geniet het.
By dié byeenkoms was daar gesoute atlete sowel as nuwelinge wat aan hul eerste byeenkoms deelgeneem het.
Die volgende byeenkoms vind plaas op 1 November by die Van Riebeeckstadion op Mosselbaai en alle belangstellendes is welkom om aan te tree. Geen ouderdomsbeperking geld nie en geen ondervinding is nodig nie.