Kragkwessie onder die loep
Dit blyk asof die gemeenskap se kopseer oor kragvoorsiening en –onderbrekings maar net nie wil wyk nie. Terselfdertyd is die Mosselbaai-munisipaliteit ewenwel bewus hiervan, veral in die gevalle waar onderbrekings toegeskryf kan word aan onwettige kragkoppelings.
Die Mossel Bay Advertiser het onlangs berig oor nege wonings wat tydens ‘n brand verwoes is. Die brand het vermoedelik ontstaan vanweë ‘n kortsluiting ná ‘n kragonderbreking. Die area waar die brand plaasgevind het, is bekend vir die hoeveelheid onwettige kragkoppelings wat gedoen word. ‘n Bekommerde inwoner van Dywilistraat in Asla Park, het ook foto’s aan die Advertiser gestuur en haar kommer oor die kragprobleme namens die gemeenskap uitgespreek.
Prioriteit
“Hierdie probleem word op die hoogste vlak in die munisipaliteit as ‘n prioriteit hanteer. Intimidasie en die veiligheid van munisipale personeel is ván die probleme tydens die verwydering van onwettige verbindings,” het Nickey le Roux by navraag gesê.
Volgens Le Roux reël die munisipaliteit daarom gereeld gesamentlike operasies met die polisie se openbare orde-eenheid, waartydens grootskaalse verwydering van onwettige verbindings gedoen word. Sy sê die operasies word gewoonlik een keer elke vier tot ses weke uitgevoer. Vanjaar, weens Covid-19-inperkings, is minder operasies uitgevoer. Sowat 300 onwettige verbindings is in twee gesamentlike operasies en verskeie kleiner operasies verwyder en daar is op talle onwettige kabels beslag gelê.
“Die munisipaliteit moet op die polisie se beskikbaarheid staatmaak. Boonop word onwettige aansluitings dikwels binne enkele ure weer herkoppel.”
Voorts, sê Le Roux, veroorsaak onwettige verbindings dat wettige kragverbruikers dikwels kragonderbrekings ondervind, veral wanneer infrastruktuur oorlaai word. “Wanneer die elektrisiteitsonderbreking in die middernagtelike ure plaasvind, is die probleem met intimidasie van so ‘n aard dat personeel se lewens in gevaar gestel word. Gevolglik kan die probleem nie onmiddellik herstel word nie.”
Alternatief
Die munisipaliteit het in sekere gebiede proaktief opgetree. Hier word die gebruik van alternatiewe hardeware getoets om onwettige verbindings te verminder en die impak op die gebiede met formele, wettige verbindings te verlaag.
“Waar die opgradering van sommige informele nedersettings later deur die UISPprogram (Upgrading of Informal Settlements
Programme) aangespreek word, is tydelike straatbeligtingskringe geïnstalleer om misdaadprobleme aan te spreek.”
Le Roux berig dat die munisipaliteit ‘n interdepartementele werkgroep gevorm het om die kwessies rakende onwettige elektrisiteitsverbindings en onwettige grondbesetting aan te spreek aangesien dié probleme verband hou. Die werkgroep het tydens die loodsvergadering reeds besluit dat meer gereelde, dog kleiner skaal operasies geloods sal word om onwettige verbindings te verwyder.
“Die elektrifiseringsprojekte vir gemeenskappe word volgens die opgraderingsprogram vir informele nedersettings (UISP) geprioritiseer en die departement sal nie van hierdie plan afwyk nie. Ingevolge die riglyne van die departement van energie sal informele strukture wat op serwitute, privaatgrond en vloedvlaktes aangebring word, nie van elektrisiteit voorsien word nie,” sê Le Roux.