Onnie krimineel aangekla
Albertinia-polisie ondersoek twee klagtes teen ‘n onderwyser van die plaaslike hoërskool, waar hy na bewering leerders sou aanrand.
Die onderwyser, Conrad October is steeds ‘n leerkrag by die skool. Beide die beweerde voorvalle het gedurende Mei 2019 plaasgevind. Die bewerings is dat hy in die een voorval ‘n seun met ‘n stok geslaan en hom in skeltaal van die skoolgronde weggejaag het. In die ander voorval het hy blykbaar ‘n meisie met ‘n bos sleutels agter haar kop gegooi en haar ook met skeltaal van die skoolgronde verjaag. Kerry Mauchline, woordvoerder vir die Wes-Kaapse minister van onderwys, Debbie Schäfer het Maandag, 9 Oktober gesê October is reeds departementeel skuldig bevind vir die meisie se aanranding. “Hy moes ‘n finale waarskuwing teken en ‘n boete betaal.”
“Dissiplinêre stappe kon nie teen October ingestel word in die seun se aanrandingvoorval nie, omdat die ouer nie toestemming aan die departement wou verleen om met die seun te konsulteer nie. Hy wou ook nie toelaat dat die seun in ‘n dissiplinêre verhoor teen October getuig nie.”
Die Wes-Kaapse polisiewoordvoerder, sersant Christopher Spies het bevestig dat October krimineel vir albei voorvalle aangekla is. Hy staan op aanklag van aanranding en aanranding met die doel om ernstig te beseer tereg. Spies het bygevoeg dat October wel op 20 Mei in hegtenis geneem is, maar op borgtog vrygelaat is.
October het Vrydag, 6 November weer in die Albertinia-landdroshof voorgekom. Die saak is na Donderdag, 3 Desember uitgestel.
Die onderwyser, Conrad October is steeds ‘n leerkrag by die skool.