Boek vir slagoffers van plaasaanvalle op dreef
'n Skrywer van Uitenhage, Nico Schamrel stel 'n gebedeboek saam om vir slagoffers van plaasaanvalle van hulp te wees. Schamrel sê hy het besluit om bekendes en die publiek te betrek. “Dit het agt maande geneem om van ons bekende Suid-Afrikaners te nader om aan my ’n gebed, skrywe, gedig of die woorde van ’n liedjie te stuur. Ek was oorweldig deur bydraes.”
Hierdie inisiatief word onder die vaandel van NS Liefdesdiens van stapel gestuur. Dit is ’n nie-winsgewende platform wat gebruik word om fondse in te samel vir liefdadigheid en My Gebed vir ’n Boer is sy eerste groot projek.
“Suid-Afrika se Mej Wêreld 1974, Anneline Kriel-Bacon, is my ambassadeur vir hierdie projek en haar bestuurder, Leonard Arendt, my assistent.”
Van die land se top kunstenaars het bydraes gelewer. Dit sluit Gerhard Steyn, Brümilda van Rensburg, Nianell, Solly Philander, Leon van Nierop, Amanda Strydom, Juanita du Plessis, AnnelineKriel-Bacon, Jo Black en Amor Vittone in. Nog inskrywings word verwag.
Schamrel nooi inwoners van Mosselbaai uit om deel te wees van die projek. 'n Inskrywingsfooi moet betaal word en dit word gebruik om die boek te publiseer.
Die fondse uit die verkope word geskenk om slagoffers van plaasaanvalle van hulp te wees.
Inwoners kan hulle gebede, gedigte, of skrywe e-pos (nicoschamrel@gmail. com). Inskrywings mag nie meer as 150 woorde wees nie en gedigte moet kort wees. Besoek www.nicoschamrel.com vir meer inligting.