‘n Liefdadigheidswinkel loop onder vandale deur
Die Da Gamaskop-polisie ondersoek voorvalle nadat boosdoeners onlangs twee keer gedurende dieselfde naweek by stoorplekke op die perseel van die NG Kerk Hartenbos ingebreek het.
Op Vrydagaand, 6 November is die stoorplekke van die kerk wat dien as 'n liefdadigheidswinkel, Kosi Baia geplunder. Swartsakke vol voorraad, bestem vir die mees weerloses in die gemeenskap, is nie net gesteel nie, maar van die klere en ander items is die hele kerkterrein vol gestrooi.
Die Saterdag na die voorval is daar met groot moeite opgeruim en dit wat af- en oopgebreek is, is weer herstel. Tot groot onsteltenis het waarskynlik dieselfde plunderaars Saterdagaand, 7 November weer toegeslaan en presies dieselfde gedoen.
Dié keer het die booswigte ook die stoorruimte met mediese hulpmiddels, waarin rolstoele, krukke en dies meer wat vir die kerk se bejaardesorgdiens gebruik word, oopgebreek. Gelukkig is geen van hierdie noodsaaklike items gesteel nie.
“Hierdie gebeure is vir die gemeenskap van Hartenbos ‘n baie hartseer belewenis. Aangesien ons Kosi Baia-winkeltjie reeds vir meer as 12 jaar as ‘n inisiatief 'van die gemeenskap aan die gemeenskap' volhoubaar bedryf word, is dit juis ons oogmerk om veral die weerloses in ons gemeenskap te ondersteun.
“Deur ons baie toegewyde span vrywilligers wat hier werksaam is, word nie net klere en ander items baie billik verkoop nie, maar word ook vriendskappe gesmee; hegte verhoudings gebou en hulp verleen wat al meermale tot mediese en pastorale ondersteuning gelei het,” sê ds Dawid de Wet van dié gemeente.
Die gemeente nooi steeds die gemeenskap om Kosi Baia, hul liefdadigheidwinkel te ondersteun. "Ons vra die gemeenskap ook om ons te help om soortgelyke gebeurtenisse in die toekoms af te weer. Baie dankie ook aan die polisie wat by beide geleenthede vinnig reageer het om ons te ondersteun."
Kontak ds Dawid de Wet by NG Kerk Hartenbos (044 695 0440) vir meer inligting.