Huis, paleis, pondok, varkhok
Eienaars van eiendom in die N2 Industriële Park slaak 'n sug van verligting nadat daar in 'n hofbevel gelas is dat die varkboerderye in die omgewing binne twee jaar geskuif moet word, maar die ongerief verduur en skade gely vanweë dié onregmatige boerdery, is 'n teer punt.
Volgend Geoff van Rensburg, voorsitter van die eienaarsvereniging het hy sy eiendom in Desember 2008 gekoop toe daar geen boerderyaktiwiteite in die omgewing was nie. Van Rensburg sê dat hy bykans 'n miljoen rand vir sy eiendom betaal het. In 2012, toe hy met ontwikkeling begin het, was daar volgens hom slegs een varkboer. Die getalle het egter oor tyd dramaties toegeneem.
Onuithoudbaar
Die Mossel Bay Advertiser het van 'n ingeligte bron verneem daar by tye tot soveel as 600 varke aangehou is.
Van Rensburg noem dat die stank van die plase vanweë swak higiëne ondraaglik geword het.
Hy vertel ook dat die diere dikwels net daar geslag word.
"Daar is bykans 40 erwe wat nog hier verkoop en ontwikkel kan word, maar niemand stel meer daarin belang nie. Ons eiendomswaarde het geweldig afgeneem.
Erwe verkoop nou vir slegs R350 000 en niemand wil koop nie."
Volgens Van Rensburg is die varkboerderye se teenwoordigheid 'n groot bydraende faktor.
'n Verdere bron van kommer wat deur die eienaarsvereniging genoem is, is dat al die afval wat deur die varkboerderye gegenereer word teen die helling afloop en uiteindelik in waterweë beland wat na Diasstrand afgevoer word.
Met die Advertiser se besoek aan die perseel 'n tyd gelede, is gemerk dat heelwat van die strukture waar diere, veral varke voorheen aangehou is, verlate staan en dat sommige ander plaasdiere soos skape huisves.
Johan Nel, eienaar en ontwikkelaar van die perseel het verkies om nie sonder goedkeuring van sy regsverteenwoordiger kommentaar te lewer nie.
Nel het genoem dat die N2 Industriële Park meer as 10 jaar gelede gevestig is en het ook genoem dat dit tans die laaste area in Mosselbaai is waar industrieë nog gevestig kan word.
Hofbevel
Van Rensburg verduidelik dat vanweë die talle klagtes van beleggers en die eienaars betreffende die varkboerderye, hulle geen ander keuse gehad het as om 'n regspad, teen hoë koste te loop nie.
Op 17 Junie vanjaar is die Mosselbaaimunisipaliteit in terme van 'n hofbevel uitgereik deur die Kaapse hooggeregshof gelas om aan die relevante bywette, wat die Oorlasverorderning insluit, te voldoen en die varkboerderye binne 'n periode van twee jaar van die huidige perseel te verwyder. "Ons is baie dankbaar teenoor die ontwikkelaar wat hierdie proses namens ons gedryf het." Die Oorlasverordening bepaal onder meer dat die eienaar van ‘n dier of die persoon in beheer daarvan nie mag veroorsaak of toelaat dat ‘n dier die gewone gerief, gemak, vrede en rus van ander mense versteur of skade vir ander veroorsaak nie. Die perseel waarop ‘n dier aangehou word, moet in ‘n skoon en netjiese toestand gehou word
om te voorkom dat ‘n openbare oorlas ontstaan.
Van Rensburg het aan die Advertiser te kenne gegee dat ten spyte van die hofbevel, daar nog min antwoorde is rakende wanneer die verskuiwing gaan plaasvind. Hy het ook beweer dat e-posse wat hy aan die Mosselbaai-munisipaliteit gerig het om hierna te verneem, nie na wense beantwoord is nie.
"Die munisipaliteit is op deurlopende basis in konsultasie met alle rolspelers ten einde te voldoen aan die hofbevel binne bovermelde voorgeskrewe tydperk. Dit sluit in konsultasie met die departement landbou en departement grondhervorming en landelike ontwikkeling. Tydens ‘n onlangse vergadering met die huidige okkupeerders is die algemene netheid van die perseel tot bevrediging van die munisipaliteit, die voorkoming van verdere uitbreiding, asook die vermindering van getalle bespreek," het die munisipaliteit in reaksie gesê.
‘Ons eiendomswaarde het geweldig afgeneem.’