'n Beiteltjie vir Baard se arbeid
Gelukwensinge het ingestroom op sosiale media nadat Petronel Baard, bekroonde sanger, liedjieskrywer en kampvegter vir die kunste op 30 November deur die Afrikaanse Woordkunsakademie met die Orde van die Beiteltjie vereer is. Baard is een van Mosselbaai se trotse uitvoerprodukte.
Die toekennings is virtueel op Facebook en op YouTube gebeeldstroom. ‘n Oorkonde, trofee en kontantbedrag is deel van elke toekenning.
Die gesogte Ordes van die Beiteltjie is vanjaar toegeken aan Frieda van den Heever, Ilse Oppelt, Petronel Baard, Frazer en Deniel Barry, Chrisna Beuke-Muir, Steffie le Roux en Deon Meiring. Dié agt sluit nou aan by die 31 toonaangewende woordkunstenaars wat sedert 2015 Ordes van die Beiteljie vanaf die Afrikaanse Woordkunsakademie, wat deur die Cordis Trust bedryf word, ontvang het.
Dr Fanie Marais, Uitvoerende Trustee van die Cordis Trust, het gesê hy is oortuig die toekennings sal die ontvangers inspireer tot groter prestasie en om ander te begeester en by te staan.
'n Groot jaar
Die jaar het egter vir Baard ook sy teleurstellings opgelewer toe die Nasionale Klein Karoo Kunstefees vanweë Covid-19 gekanselleer is en sy nie daar kon optree na 'n lang afwesigheid by die fees nie. Nie iemand wat haar maklik laat onderkry nie, het sy haar dadelik na die aanlynplatform gewend. Op hierdie manier het haar pad met die Cordis Trust gekruis en het goeie samewerking ontstaan. Soveel so dat sy en haar span by die beeldsending van die toekenningsgeleentheid betrokke was.
Saam met die Cordis Trust was sy gedurende die jaar by verskeie aanlynkonserte betrokke.
Sy beskou 2020 as 'n groot jaar. As deel van die Theatre Collective, het sy saam met verskeie rolspelers in die kunstebedryf voorleggings help formuleer wat deur die nasionale parlement aangehoor is. Sy verduidelik dat die lywige dokument van bykans 100 bladsye daarop gemik is om onder meer beter kommunikasie tussen die departement van kultuursake en sport en die kunstegemeenskap te bewerkstellig.
"Ek is baie opgewonde hieroor, aangesien dit die eerste keer in my 21 jaar in die bedryf is dat ek soveel samewerking binne die kunstegemeenskap op alle vlakke sien." Van haar werk op plaaslike vlak wat betref die baanbrekerswerk wat die Mosselbaai Kreatiewe Kultuurassosiasie (Mokka) doen, is ook raakgesien en word tans ingespan om as 'n gevallestudie te dien vir kunste-ontwikkeling.
Baard is vroeër in November deur die FAK Kultuurnetwerk vereer tydens die plaaslike Inspirasie Vrou-toekennings wat vir die eerste keer vanjaar aangebied is. Sy dien ook op die Wes-Kaapse Kultuurkommissie, asook die Tuinroete Filmkommissie.
Bemoediging
Petronel Baard het haar loopbaan 21 jaar gelede met 'n gesogte ATKV Crescendotoekenning op 'n hoë noot begin.
Sy was dit nog altyd eens dat die kunste die wegtrekpunt behoort te wees vir gemeenskapsontwikkeling in Suid-Afrika. Sy is van mening dat die kunste die plek is waar mense mekaar kan vind en kan opbou.
Baard het vandeesweek aan die Mossel
Bay Advetiser gesê dat sy mateloos beïndruk is met die Cordis Trust se ywer vir die Afrikaanse kunste.
Hoewel sy die toekenning geensins verwag het nie, het Baard beken dat erkenning op jou werk maar altyd iets is wat enige mens se hart verbly. "Dit dien as groot bemoediging ook op mens se pad in die wildernis per se."
Die toekennings wat op Cordis Trust se Facebookblad http://www.facebook.com/ cordistrustwww.facebook.com/cordistrust en YouTube-kanaal https://bit.ly/cordisYT, gebeeldstroom is kan steeds hier gekyk word.