Swak bywoning stel diep teleur
“Dit is teleurstellend om te sien dat dit net weer die gewone ou staatmakers is wat vandag hier is; hulle wat voorvat in die gemeenskap en sê ons staan vir die regte van vroue en kinders.”
Dit was die woorde van ao Morné D’Emiljo van Stilbaai-polisie op Woensdag, 25 November wat die verwelkoming behartig het met die amptelike afskop van die 16 dae van aktivisme van geweld teen vroue en kinders. Slegs ‘n handjievol mense het by die gemeenskapsaal op Melkhoutfontein opgedaag. D’Emiljo het bygevoeg dat hy die slagoffers, maar so ook die oortreders wat spesiaal genooi was om die geleentheid by te woon om bemagtig te word, mis.
Die geleentheid was deur pastoor Jannie Kleynhans geopen, waarna sers Christiana Lewaks, sosiale misdaadkoördineerder en sameroeper, ‘n kort oorsig van die ontstaan en betekenis van die 16 dae van aktivisme gegee het. “Dit word nie net plaaslik nie, maar wêreldwyd, elke jaar op 25 November geloods en dit duur tot 10 Desember,” het sy verduidelik.
Die plaaslike gemeenskapspolisiëringsforum (GPF), die gesins- en kinderbeskermings eenheid van die polisie en maatskaplike ontwikkeling (Riversdal) was ook verteenwoordig.Twee oud-polisielede, Albert en Chrystel Cloete het as sprekers opgetree om slagoffers van geweld te bemagtig.
Veral Chrystel het ‘n vurige pleidooi tot die gemeenskap gerig om jeugdiges wat dwelms gebruik of hulle aan misdadige gedrag oorgee, te probeer help. “Al maak dit net ‘n verskil in een kind se lewe, is dit klaar die moeite werd.”
Deon du Toit, ‘n proefbeampte by maatskaplike ontwikkeling het gesê dat bewusmaking van geweld teenoor vroue en kinders is uiters belangrik. “Ons wil vandag ook ons slagoffers van geweld bewus maak van wat hulle kan doen indien daar geweld in die huishouding is, nie slegs teen vrouens nie, maar ook mans en met kindermishandeling,” het hy gesê.
Volgens hom het sulke bewusmakingsveldtogte ‘n positiewe uitwerking en neem gevalle beslis af waar dit aangebied word. Adjudantoffisier Adriaan Olivier van die gesins- en kinderbeskermingseenheid wat bietjie later opgedaag het omdat hy besig met ‘n arrestasie van ‘n seksuele oortreder was, het tydens sy spreekbeurt klem daarop gelê dat die bure, of enigiemand wat van gesinsgeweld bewus is, dit moet aanmeld.
“Indien die saak nie opgevolg word nie, gaan meld dit weer aan - en weer, tot iemand luister en daar werk van gemaak word. Moenie moed opgee en dit net daar laat nie," het hy beklemtoon.
“Ongelukkig is dit so dat dit vir ‘n slagoffer, veral een van verkragting, voel dat hy of sy die beskuldigde is wanneer die saak in die hof voorkom en daar is feitlik geen ondersteuningsnetwerk van die staat se kant af vir daardie persoon nie,” het hy gesê.
Dianne Miggels het die bedankings behartig, waarna ‘n gelukstrekking gehou is en geskenke aan die sprekers oorhandig is. Almal het ook ‘n mooi vetplantjie ontvang. Lewaks, wat baie moeite met die uitnodigings, eetgoed en selfs kaartjies van bemoediging handgemaak en dit by elke bordjie gesit het, het na die geleentheid ook haar teleurstelling oor die swak bywoning teenoor Suid-Kaap Forum uitgespreek.
“Vir so ‘n belangrike saak soos dié sou mens werklik verwag dat ons gemeenskap meer belangstelling sou toon. Dit is eintlik baie hartseer.”