Mosselbaai met vyf Blouvlagstrande bekroon
Die Mosselbaai-munisipaliteit het vandeesweek in 'n persverklaring bekend gemaak dat Mosselbaai weer met vyf Blouvlagstrande bekroon is. Dit sluit in Santosstrand, De Bakke, KleinBrakrivierstrand, Hartenbosstrand, en Glentanastrand.
Om te bewys dat Mosselbaaiers ernstig is die plaaslike strande se Blouvlagstatus, word inwoners en vakansiegangers uitgedaag om by te dra tot die etos van volhoubaarheid hiervan deur verkieslik na die strande te stap om só ons omgewingsimpak te beperk.
Die Wildlife and Environment Society of South Africa (WESSA) het sy lys van Blouvlagstrande vir 2021 pas bekend gestel. In totaal is 48 plekke op die finale lys, met 'n meerderheid van die gesogte toekennings in die Wes-Kaap.
Die Blouvlagtoekenning is 'n manier om plaaslike en buitelandse besoekers te verseker dat geakkrediteerde strande skoon, veilig en bowenal omgewingsveilig, is.
Die Blouvlag is 'n sertifisering van die Foundation for Environmental Education (FEE) dat 'n strand aan die organisasie se standaarde voldoen. FEE se Blouvlag-kriteria bevat standaarde vir gehalte, veiligheid, omgewingsopvoeding en -inligting, die deurentydse lewering van dienste en algemene omgewingsbestuurskriteria. Die Blouvlag is gesogte erkenning vir strande, seiljagklubs en toeriste-operateurs vir volhoubare bootvaart as 'n aanduiding van hul hoë omgewings- en gehalte standaarde.