Vullis kry wind van voor
Wanneer ‘n mens met toewyding werk, word die werksywer gou aansteeklik en word dit gou vir ander mense aanloklik om ook ‘n handjie by te sit.
Dit is hierdie benadering tot sy dagtaak wat munisipale amptenaar, Charl Willemse, die senior voorman (oop ruimtes en onwettige storting) gehelp het om inwoners aan te spoor om saam te werk om rommel in oop ruimtes op te ruim.
Mosselbaai-munisipaliteit spandeer jaarliks aansienlike bedrae geld om rommel en vullis op te ruim. Nou, met die toename in Covid-19 in die Tuinroete en die bewese gevare van rommel vir individuele en omgewingsgesondheid, het Willemse noemenswaardige werk verrig deur areas wat gereeld met rommel bestrooi word, onder hande te neem. Nie net het hierdie volgehoue taak ten doel om die omgewing skoner agter te laat nie, sy harde werk en motivering slaag ook daarin om inwoners te oortuig van die noodsaak om liefs van grootmaatvullishouers en vullissakke gebruik te maak om huishoudelike vullis verantwoordelik weg te gooi.
Die jongste in ‘n reeks van projekte het op Asla Park en Nkosana Mbangistraat gefokus. Selfs meganiese toerusting is waar moontlik ingespan om van die vullis op te skep en weg te neem. Nie alle areas was met voertuie toeganklik nie en harde handewerk het sakke vol vullis tot gevolg gehad. Dit is veral bemoedigend dat al meer van die plaaslike inwoners ‘n handjie bysit in die opruimingsproses.