Noodoefening verloop glad
'n Motorhandelaar in Voorbaai het verlede week net lof gehad vir Mosselbaai se nooddienspersoneel nadat hulle 'n brandoefening gehou het soos voorgeskryf word deur die Wet op Beroepsgesondheid en Veiligheid.
Na vergaderings met die betrokke instansies, is daar ooreengekom dat geen spesifieke tyd vir die oefening bepaal sal word nie. Met 'n noodplan in plek, het Mosselbaai Volkswagen op Donderdag, 26 November om 11:00 'n noodoproep na die brandweer gemaak om 'n "brand" op die perseel aan te meld.
Slegs nege minute later het die brandweer opgedaag. Vyf minute later is 'n persoon wat tydens die brand as "vermis" gerapporteer is, uit die gebou gehaal en is hy op die toneel deur By Grace-ambulansdienste se personeel "behandel".
Sowat 20 minute later, was die hele oefening afgehandel.
Die Wet op Beroepsgesondheid en Veiligheid vereis van 'n werkgewer om ‘n werkomgewing in stand te hou wat veilig en sonder risiko vir die gesondheid van sy werknemers is.
Mosselbaai se hoof van wetstoepassing, Henry Williamson versoek dat verkeer altyd sover moontlik na links moet beweeg om ruimte te skep vir noodvoertuie wat van agter na 'n noodtoneel moet beweeg. Wanneer dit weer veilig is, kan motoriste dan na hul gewone baan terugbeweeg. Dit sou beteken dat motoriste in die geel streep of op die skouer van die pad kan oorbeweeg, maar slegs as en wanneer dit vir hulle veilig is om so te ry. Veral in spitstye en vakansietye wanneer verkeer baie druk is, verkort dit die reaksietyd van noodvoertuie veral op Louis Fourieweg wat by tye swaar onder verkeer deurloop.