Een en ander oor die aas
Die vakansie is op ons en talle voertuie met binnelandse registrasienommers word reeds opgemerk. Hengel is hoog op baie se agenda en groot verwagtinge van gevegte met die blinklywe word gekoester.
Daar word behoorlik uitgesien na die sorgelose dae langs die see met ‘n visstok in die hand.
Onthou net dat daar dae is wanneer die see nie reg vir visvang is nie, of dat die wind verkeerd waai. Dis sulke dae wanneer jy die hengel moet kombineer met ander aktiwiteite soos “aasmaak”, oftewel die versameling van aas, swem, braai en inkopies doen. Ja, inkopies gáán jy doen en dit sluit ‘n paar besoeke aan die hengelwinkel in vir raad en die aankoop van hengelgerei en aas. Alles het duur geword, maar jy wil graag die tydjie by die see geniet én die plaaslike hengelwinkels ondersteun. Dus, druk maar deur; jy wag immers al ‘n jaar of meer vir hierdie geleentheid.
Aasmaak behoort ‘n genotvolle deel van jou hengeldag uit te maak. Die verkenningstog deur laagwaterrotspoele, die vang van ‘n seekat en ‘n paar krappe, uitsny van vars rooiaas en hengel vir strepies en kolsterte in sloepe, kan alles deel wees van ‘n aangename hengeldag.
Én jy het goeie vars aas om vanaand of môre mee te hengel.
Wees uiters versigtig met die aankoop van gevriesde verpakkings tjokka en sardyn. Veral tjokka is deesdae ‘n peperduur aas. Maak dus driedubbeld seker dat jy kwaliteittjokka koop. Die vleis moet melkwit wees. Tjokka waarmee te lank gewag is voordat dit gevries is, het suur geword, vertoon pienk en visse trek meestal neus hiervoor op. Die ideaal is om jou tjokka deurgaans baie koud in die koelhouer te hou met die oog op herbevriesing na ‘n uitstappie.
Vars gevriesde sardyne se oë is helder en deurskynend, die vissies vertoon nie geel nie en die vel het nie ‘n gekreukelde voorkoms met fyn barsies daarin nie. As die sardyne uit hul kartonhouers gehaal word en dit vertoon bloederig aan die onderkant, is dit ‘n teken dat die aas minstens een keer ontdooi het nadat dit gevries is. Die kans dat sulke aas aan die pap kant sal wees, is baie goed.
Deesdae word voorkeur gegee aan individueel gevriesde sardyne waar elkeen netjies in sy eie sakkie verpak is binne die groter verpakking wat jy aankoop. Nou hoef die hele pak sardyne nie ontvries te word nie en is dit dus meer ekonomies. Indien jy om een of ander rede nie tjokka of sardyn kan bekom nie, is seekat en strepies ‘n uitstekende alternatief.
Die afgelope 14 dae was die weer en wind wispelturig en die vangste nie te waffers nie.
Met die duisende vakansiegangers wat eersdaags op die Suid-Kaap gaan toesak, word albei duime styf vasgehou dat die weer gaan saamspeel.