Die Hun is nog met ons
Chris Barnard, die literator en nie die medikus nie, het in sy boek genaamd Chriskras bogenoemde aangeraak. Syns insiens is ons, die gewone burgers, skandelik uitgelewer aan die knersende wiele van die staat, groot korporasies of alle organisasies wat in donker kamers en in die donkerte planne prakseer.
Chris noem onder andere dat jy een oggend in 'n gemoedelike stemming afsit na die poskantoor om 'n pakkie daar te gaan afhaal. Niksvermoedend dat die Hun agter die toonbank slaggereed is om jou gemoedelike stemming in die grond te vertrap. Jou ID word gevra en jou getekende strokie word gevra. Geen problem. Jy skuld X-bedrag vir die afhaal. Gelukkig het jy geld op jou.
Jy is by die verkeerde adres. Hierdie soort pakkies word elders in die dorp afgehaal.
Chris, jy weet nog niks. Dis niks in vergelyking wat ons moet deurmaak vandag nie. Kom ons neem 'n eenvoudige saak soos om jou motorlisensie te hernu. Ons sluit vir eers die probleme van Covid-19 uit.
'n Familielid het onlangs syne moes vervang. Hy ry toe uit Mitchell's Plain uit na Parow, want in die Plain sou hy twee keer in die dieselfde ry moet staan om dalk dan die derde dag gehelp te word.
Hy is sewe-uur die oggend agter in 'n lang ry, in die son voor Parow-munisipaliteit. Geduldig, gedienstig, gedwee. Geen stoel of sitplek of koelte nie.Voetjie per voetjie vorentoe. Om eers teen eenuur gehelp te word.
Mensig, dis nou 'n allemintige vorm van deursettingsvermoë.
Nou wonder ek maar net: kan hierdie proses nie maar gedesentraliseer word nie, sodat mens hierdie lisensies ook maar by afdelingswinkels kan koop, of by die poskantoor? Ons het dit mos op 'n kol so gedoen. Wat dit nog erger maak is dat die motoreienaar self in die ry moet staan. Dan moet hy 'n magdom dokumente toon wat niks met die motor self te doen het nie. Bewys van jou adres, jou ID, ens. Geen wonder hulle vra nie nog bewys van jou siektes nie en ook van jou voorouers nie. Dalk kom dit nog.
Niemand lig jou vooraf hiervan in nie. Die inligting is glo alles op die elektroniese media. Bid dit jou aan! Ek reken nie mense in die plakkerskamp en ander arm woonbuurte is hieroor geraadpleeg nie. Wie gee dan ook vir hulle om? Skandalig, mnr die Hun! Ek wonder hoe hierdie deurlugtiges hulle eie lisensies bekom. Beslis seker nie in die lang toue nie. Ons kan mos maar 'n ekstra R10 daarvoor betaal. 'n Direkteur kan in hierdie tyd duisende rande vir ons ekonomie verdien. Geen wonder ons land se ekonomie struikel so nie.
Hierdie is maar net my beskeie mening.