Wind maak moles op gholfbaan
Die Boggomsbaaigholfklub is op 10 Oktober 1984 in gebruik geneem na 'n klompie boere, 'n paar geleerdes en 'n paar sakemanne die gedagte om 'n gholfbaan te bou werklikheid laat word het.
Fanie Janse van Vuuren, eienaar van Mosselbaai Toyota, het ingeskop met 'n borgskap vir die opening en so het die paadjie tussen Mosselbaai Toyota en die Boggomsbaai-gholfklub begin. 'n Verhouding wat hierdie jaar sy 36ste herdenking gevier het met Mosselbaai Toyota wat verlede Saterdag weer op Boggoms geborg het.
'n Heerlike somersoggend het in 'n winderige affêre verander en die spelers se eerste en tweede nege se tellings toon dan ook die nadelige invloed van die wind.
Die volgende spelers het die beste gevaar in die Individuele Stablefordkompetisie:
1. Chris Feiertag 39; 2. Johan Winterbach 38; 3. Bennie Pienaar 37; 4. Erich Hough 36;
5. André Beukes 36; 6. Gerrie Gouws 35; 7. Ernest Roux 34 en 8. Hennie Pienaar 34.
Naaste aan die penne is gewen deur Gerrie Gouws op 6/15 en André Beukes op 9/18. Jaco
Pienaar wen die naaste aan die pen vir twee houe op nommer 1/10.
Boggomsbaai se gholfbaan lyk baie mooi en spelers van die omgewing word genooi om te kom inskakel by die verdere borgdae gedurende die feesseisoen.
Eerskomende Saterdag, 12 Desember, borg Jakkalsvlei Wyne 'n 4BBB-kompetisie, op Woensdag, 16 Desember bied Julyan Bruyns 'n IPS-kompetisie aan en op 19 Desember bied Buffelsdrift Game Lodge 'n IPS-kompetie aan. Supa Quick van George bied op 9 Januarie ook 'n IPS-kompetisie aan. Die gholfbaan is elke dag oop vir besoekers.
Kontak vir André Beukes (082 460 0503) vir navrae.
Tydens die laaste SuidKaap Sagesbyeenkoms van die jaar ding die spelers mee om die Bertus Louw-trofee en die persoon wat met die trofee wegstap, is die nie-amptelike individuele kampioen van die jaar.
Dié eer kom in hierdie vreemde jaar die Mosselbaaier, Kwartus Sieberhagen, toe. Hy het op Dinsdag, 1 Desember loshande voor geëindig toe 46 spelers op Riversdal saamgetrek het om mekaar die stryd in 'n individuele Stablefordkompetisie aan te sê.
Michele Sharwood en haar helpers, Estie en Katie het die spelers is op 'n heerlike ontbyt by die Riversdal-gholfklub trakteer. Riversdal se gholfbaan is in 'n pragtige toestand en Nel Mulder en sy span moet voorwaar krediet vir hul harde werk kry om die baan voor te berei.
Die volgende spelers het die beste gevaar
1. Kwartus Sieberhagen 40 (Mosselbaai en nuwe houer van die Bertus Louw-trofee); 2. Nel Mulder (Riversdal) 38; 3. Grové Koch (Riversdal) 38; 4. Rodney Page (Stilbaai) 37;
5. Bennie Pieterse (Mosselbaai) 37; 6. Celia Hart (Stilbaai) 35; 7. Pinoc Jacobs (Stilbaai) 35; 8. Denzil Geldenhuys (Riversdal) 35.
Naaste aan die penne, soos altyd geborg deur JC Slagtery van Riversdal, is deur Cassie Swanepoel van Boggomsbaai op nommer 8 en Mariaan Loots van Mosselbaai op 4/13 gewen. Spogtwees is deur Denzil Geldenhuys en Grové Koch van Riversdal en Wessel de Bruyn van Stilbaai behaal.
By dieselfde geleentheid het die Suid-Kaap Sages ook hul algemene jaarvergadering gehou en is nog 'n Mosselbaaier, Nic Marais tot die nuwe voorsitter verkies. Grové Koch, wat vir vier jaar die leiding geneem het is die nuwe ondervoorsitter.
In sy laaste voorsittersverslag het Koch die spelers vir hul goeie bywoning van die Sagessaamtrekke bedank en ook die ruimhartige bydrae wat hulle elke jaar tot Kansa maak. Selfs in hierdie Covidjaar het die Suid-Kaap nog steeds daarin geslaag om R8 300 vir Kansa in te samel. Nog 'n hoogtepunt in 2020 was die goeie oorwinning wat Suid-Kaap voor Covid oor Outeniekwa behaal het met die Stigtersbekerkompetisie.
In November het die Suid-Kaap Sages ook 'n skenking van R3 000 aan die Erfenisfonds op Vleesbaai gemaak. Die fonds is na die dood van Nelson Mandela gestig en het as doel om behoeftige gesinne by te staan.
2020 was natuurlik by uitstek 'n jaar wat hom daartoe geleen het as gevolg van Covid-19 met baie families wat swaargetrek het toe werksgeleenthede opgedroog het. Hulle kon dus, ook met die hulp van baie huiseienaars op Vleesbaai, families dwarsdeur die groot impaktyd van die pandemie bystaan om kos en komberse te kry.
Die Sagesprogram vir 2021 is klaar opgestel en daar word op 19 Januarie afgeskop met 'n 4BBB-kompetisie op Riversdal.