Mosselbaaier maak sportgeskiedenis
Shireen Noble is verlede Saterdag, 8 Mei aangewys as die eerste vrou in SuidArikaanse geskiedenis om die amp van vise-president by Atletiek Suid-Afrika (ASA) te beklee.
Die aankondiging is tydens die organisasie se algemene jaarvergadering in Johannesburg gemaak.
In 'n telefoniese onderhoud met die Mossel Bay Advertiser hierdie week, het Noble gesê dat die gedagte aan so 'n hoë pos nog nie heeltemal ingesink het nie.
"Ek is 'n plat op die aarde mens, 'n titel gaan my nie verander nie."
Sy het bygevoeg dat haar nuwe pos ook nie net in haar skoot geval het nie. "Ek het gewerk daarvoor," het sy gesê.
Noble het vertel dat sport dik in haar familie, beide aan moeders- en vaderskant se bloed loop. Haar pa is die bekende oudSARU-rugbyheld, David Smith.
Sy het egter die sport administrasie pad gekies, skerts sy. En dit is iets waarin sy haar beslis onderskei het.
Noble het vir meer as 20 jaar in verskeie portefeuljes by SWD Krieket diens gedoen. In 2004, met die vestiging van vrouekrieket in die streek, word sy die eerste voorsitter van SWD Vrouekrieket. Sy gooi ook haar gewig by die ontwikkeling van mini-krieket vir skole in.
Tans, dien sy steeds op SWD Krieket se transformasie komitee.
Wat die pad vorentoe betref meen Noble dat sy dinge wil sien gebeur.
“Ek wil verandering sien en dat die planne wat ter tafel gelê word, uitvoerbaar moet wees.
“Deursigtigheid is vir my baie belangrik, my lewe hang letterlik daarvan af.”
Omdat sy gewoond is daaraan om doelwitte aan haarself te stel, wil sy sien at ASA ook hulle teikens bereik.
Dít glo sy, is haalbaar deur eenheid en samewerking binne die bestuur.
Aan vroue in sportbestuur en -administrasie sê sy dat daar wel vir hulle 'n definitiewe toekoms is.
Haar mening is dat vroue en mans in die wêreld van sport administrasie beslis op gelyke veld kan uitdaag.
"Ken jou sportkodes se reëls en bly op hoogte van verandering."
Sy bedank haar komvandaan, Mosselbaai vir hulle goeie wense en ondersteuning.
"Ek sal julle nie teleurstel nie.
Ek weet wat ek wil bereik."