‘Mosselbaai se Mandela’ eindelik vry
Nicklo Pedro, die struggle-veteraan het sy stryd teen kanker verloor. Pedro (54), is op Saterdag, 8 Mei in die sorg van sy vrou, Jacqueline oorlede. In ‘n persverklaring uitgereik deur die ANC van die Wes-Kaap, is na Pedro verwys as “the people’s soldier and one of the brightest flowers of the revolution”.
Hy is gewerf deur Umkhonto we Sizwe (MK) tydens sy regstudies aan die Universiteit van Wes-Kaapland. Terwyl hy van die veiligheidspolisie gevlug het, is hy in Augustus 1987 naby die Lesotho-grens in hegtenis geneem. Hy is teruggeneem na Kaapstad waar hy aan die onmenslike marteltegnieke van ao Jeffrey Benzien onderworpe was.
Sy verhoor, saam met 15 ander MK-soldate het in 1998 die Kaapse hooggeregshof begin en 65 dae lank geduur. Op 14 Desember 1988, is hy tot 14 jaar tronkstraf plus ‘n verdere 10 jaar, opgeskort vir vyf jaar gevonnis.
Hy het sy vonnis op Robbeneiland uitgedien en is in May 1991 vrygelaat.
Onthou
Familie en nabye vriende het vandeesweek die man wat hulle beskou as “Mosselbaai se Mandela” onthou.
Dexter Brinkhuis sê dat enige vorm van onreg vir sy vriend onaanvaarbaar was. Pedro se enigste oorlewende broer, Roderick vertel dat hulle as kinders danksy hulle ma se gemeenskapsbetrokkenheid as verpleegkundige en stigterslid van SANTA op Mosselbaai, eerstehands met die tipiese ongelykhede Suid-Afrika te doene gekry het.
“Dit was ‘n groot dryfveer in sy lewe en politieke loopbaan.”
Volgens ‘n niggie en oudklasmaat, Melita Brinkhuis, was Pedro op hoërskool reeds ‘n vurige politieke aktivis. “Hy het ‘n ongelooflike intellek gehad, jy kon na hom luister. Hy’t mense met hom saamgeneem."
Lenise Hendricks, ook 'n jarelange vriendin, het vir Pedro skoolgehou. “Hy het my altyd van die allerbeste raad bedien. Hy was my 'privaat prokureur'."
‘n Hoogtepunt vir haar was toe hy in 2020 kort voor die Covid-19-inperking, sy lewensverhaal met leerders van sy alma mater, Hoërskool Sao Bras tydens 'n praatjie kon deel.
Diensbaar
Na sy vrylating is Pedro versoek om by die Suid-Afrikaanse Weermag aan te sluit. In 1995, keer hy terug na Mosselbaai om te dien as munisipale raadslid.
Hier dien hy onder meer saam met Michael Carelse, die eerste bruin burgemeester van Mosselbaai.
"Ons was maar jonk en onervare om Mosselbaai te verander van wat dit voorheen was, maar het ons merk gemaak."
Carelse reken dat al die raadslede van daardie tyd min erkenning kry vir hulle bydrae tot verandering.
“Ons het Visie 2030 help formuleer, onder meer om toerisme as ‘n trekpleister te ontwikkel. Nicklo was baie skerp. Hy kon net enigeen argumenteer."
Wayne Jordaan, wat saam met Pedro in die Lesley Crotz-tak van die ANC gedien het, noem hom ‘n gemeenskapsmens by uitstek.
“Hy sou homself tekort doen vir ander. Hy was nog in die tuig tot op die einde. "
Vir Jordaan was Pedro se uitstaande kwaliteit, ten spyte van sy stryd as vryheidsvegter, sy gawe vir rekonsiliasie.
Pedro het hom ook bewyer vir aksie teen geslag s gebaseerde geweld, die dwelmmisbruik krisis, asook armoedeverligting.
Hy was drie jaar met Jacqueline getroud. “Nicklo het my van ware humanity kom leer.” Hulle het ‘n besonderse liefde gedeel.
Nicklo Pedro laat sy vrou, Jacqueline, haar kinders, drie kinders uit ‘n vorige huwelik, twee kleinkinders, ‘n broer en ‘n suster agter.
Hy word op 22 Mei begrawe. *Lees meer aanlyn by www.mosselbayadvertiser.com