Gemeenskap raadop met binnelandse sake-moles
Gefrustreerde lede van die gemeenskap het opnuut hulle monde op sosiale media uitgewas aangaande hul frustrasies om persoonlike dokumente by die plaaslike departement van binnelandse sake te bekom.
Van die klagtes sluit in dat daar dikwels ure lank in lang toue gewag moet word, net om onverrigtersake tuiswaarts te keer omdat die stelsels glo van lyn af is. Onder die kommentaar gelewer op ‘n Facebookinskrywing wat verlede week gemaak is, word te kenne gegee dat daar persone is wat sedert Desember al sukkel om hul dokumentasie te bekom.
Die Mossel Bay Advertiser het ook verlede week weer opnuut telefoniese klagtes ontvang oor die toedrag van sake by die plaaslike kantoor.
“Ons was al sewe tot agt keer daar, net om te hoor die stelsel is van lyn af,” het ‘n inbeller van Danabaai gekla.
Die Mosselbaai-munisipaliteit het na aanleiding van die navrae, namens die departement van binnelandse sake op Vrydag, 7 Mei ‘n verduideliking vir die huidige situasie aangebied.
“Binnelandse sake by die Thusong-sentrum in Adriaansweg, Mosselbaai se IT-stelsel verskaf probleme wat meebring dat stelsels dikwels nie beskikbaar is nie. Gevolglik moet binnelandse sake van Vodacom na Telkom migreer, en die installasie mag ongeveer twee weke duur.
“Nomzi Jika, die bestuurder van die Thusong-sentrum en verantwoordelik vir regeringsdienste aan die gemeenskap, vra verskoning vir die ongerief en vra dat kliënte geduldig sal wees.
“Sodra die stelsel weer aanlyn is, sal inwoners in kennis gestel word. Die werk behoort van 7 Mei tot 24 Mei te duur. Sou die installasie vroeër voltooi word, of straks meer tyd verg, sal terugvoering gegee word,” het die verklaring gelui.