Oorlaaistasie skep werk
As deel van hul oorsigfunksie, het die uitvoerende raadslede van die burgemeesterskomitee en senior munisipale amptenare Dinsdag, 11 Mei besoek gebring aan die nuwe munisipale oorlaaistasie op Herbertsdale.
Dié nuwe fasiliteit word sedert April bedryf en ses van die dorp se inwoners is onder meer hier vir herwinning verantwoordelik.
Die fasiliteit, wat sowat R1.2 miljoen rand beloop het, het reeds bykans drie ton se huishoudelike vullis herwin sedert dit in April in gebruik geneem is.
“Die fasiliteit is iets vir die dorp om op trots te wees. Daar is nou deurentyd sekuriteitsbeamptes. Die kinders kan nie meer tussen die rommel speel nie en daar is behoorlike beheer.
Ons dorp se mense baat ook by die werk wat geskep word,” het een Herbertsdaler genoem.
Die speaker, raadsheer Petru Terblanche het ‘n beroep op inwoners gedoen om reeds tuis hul vullis te sorteer sodat die taak vir die herwinningspersoneel vergemaklik kan word.
“Die mense wat vir herwinning verantwoordelik is, verrig ‘n onontbeerlike taak wat bydra om die omgewing vir ons nageslag te bewaar.”
Mosselbaai-munisipaliteit moedig die hergebruik, vermindering en herwinning van afval aan sodat heelwat minder vullis uiteindelik en teen groot koste op vullishope beland.
“Sou almal saamwerk om herwinbare afval te bestuur, behoort nie meer as 20% van vullis op vullishope te beland nie,” aldus die direkteur van gemeenskapsdienste, Elize Nel.
Die senior bestuurder van afvalbestuur van by die Mosselbaai-munisipaliteit, Sivu Mtila sê beperkte gevaarlike afval kan op Herbertsdale hanteer word, met voorsiening wat onder meer gemaak is vir die veilige hantering van batterye.
“Die voorneme is om binnekort te begin met die kompostering van die groen tuin-afval om ook dit produktief te kan hergebruik,” berig Mtila.