Polisie kry pluimpie oor verloofring
‘n Bejaarde vrou van Seemeeu Park, Hartenbosheuwels het van vreugde trane gestort toe sy ‘n verloofring waaraan sy groot sentiment het, weer aan haar ringvinger kon steek.
Die vrou het volgens inligting verskaf deur die Da Gamaskop-polisie wat die diefstalsaak ondersoek het, op 20 April haar verloofring ter waarde van R38 000 afgehaal en soos gebruiklik in ‘n juwelekissie in haar kas gebere.
Haar huiswerker het intussen by die huis kom werk en toe die vrou per geleentheid na die ring soek waar sy dit gelaat het, was dit weg. Haar ander juwele was onaangeraak, maar slegs die ring is vermis. Sy het die huiswerker gekonfronteer, maar die vrou het ontken dat sy van so ‘n ring kennis dra.
Op 26 April het die bejaarde vrou die diefstal by die Da Gamaskop-polisie aangemeld, waarna kst Wendell Januarie die inligting verskaf, opgevolg het. Januarie het die huiswerker ondervra waarna sy ‘n bekentenis afgelê het. Sy het ook die plek waar sy die ring vir R1 100 verpand het, uitgewys.
Januarie het die ring op 27 April aan die bejaarde vrou terugbesorg, wat verheug was om dit terug te kon kry.
“Die ring was nie net waardevol nie, maar het groot sentimentele waarde vir my aangesien my man dit 37 jaar gelede aan my gegee het. My man is verlede jaar oorlede, wat die diefstal nog erger gemaak het,” het sy in ‘n brief van waardering aan die Da Gamaskop-polisie geskryf. Sy het Januarie geloof vir sy uitstekende diens.