NUUS VANUIT HEIDELBERGPOLISIEKANTOOR

Ontvoering

Die man wat die dorp verlede week op hol gehad het toe hy met sy meisie se babaseun vir twee dae verdwyn het na hy gedreig het om homself te hang, het Maandag, 10 Mei weer vlugtig in die plaaslike landdroshof verskyn.

Elseno Oktober (30) het Vrydag, 7 Mei vir die eerste keer verskyn op aanklag van ontvoering na hy Woensdag, 5 Mei in die vroeë oggendure in sy sinkhuis met die babaseun aangetref is. Hy bly in hegtenis tot sy volgende verskyning.

Verkragting

Justin Carelse (30) van Slangrivier het Maandag, 10 Mei in Heidelberglanddroshof op aanklag van verkragting verskyn. Die saak hou verband met die verkragting van ‘n 21-jarige vrou wat verlede jaar in Slangrivier na bewering deur die beskuldigde verkrag is.

Carelse is onlangs in Swellendam in hegtenis geneem nadat hy nie vir sy laaste verskyning by die hof opgedaag het nie. ‘n Lasbrief is vir sy inhegtenisneming tydens sy laaste verskyning uitgereik.

Hy moet Vrydag, 14 Mei in die streekshof op Riversdal verskyn. Hy is tans in aanhouding.

Inbrake

‘n Drie-twintigjarige man van Heidelberg is agter tralies na hy positief met vele inbrake in die dorp verbind is. Duncan-Lee Steenberg is Vrydagoggend, 7 Mei in hegtenis geneem na ‘n lasbrief vir aanklag van roof teen hom uitgereik is.

Steenberg word met ‘n inbraak by die plaaslike daghospitaal verbind wat tydens Paasnaweek gepleeg was. ‘n Skootrekenaar ter waarde van ongeveer R30 000 is tydens die voorval gesteel. Hy het ook na bewering by ‘n plaaslike vars vishandelaar se winkel in die middedorp ingebreek en ‘n volledige rekenaarstelsel, ‘n kasregister, asook sowat R200 kontant gesteel.

Die kasregister is oorkant die winkel op ‘n besigheidsperseel uitgewys.

Steenberg het Maandag, 10 Mei vlugtig in die hof verskyn. Hy verskyn weer Dinsdag, 18 Mei op die onderskeie klagtes. Hy bly in aanhouding.