Kindersorg hou jongspan besig
‘n Program om kinders meer bewus van verskillende veiligheidsmaatreëls te maak, is op Donderdag, 29 April deur Kindersorg SA Riversdal op Kwanokuthula buite die dorp aangebied.
Working on Fire (WoF), asook die plaaslike brandweer, polisie, verkeersdepartement en kliniek is by die projek betrek. ‘n Totaal van 107 kinders is op die dag bereik.
Die brandweer en WoF het ‘n praatjie oor brandveiligheid gedoen en het die kinders laat deelneem deur aan hulle vrae te vra, wat baie entoesiasties beantwoord is. Hulle het ook prakties gedemonstreer hoe die water uitkom wanneer ‘n brand geblus moet word, asook hoe om te dril, tot groot vermaak van die kinders.
Die polisie se kommunikasiebeampte, sers Christiaan Jansen het oor algemene veiligheidsmaatreëls gesels. Suster Schaap van die kliniek het op Covid-19veiligheidsmaatreëls gefokus en bewusmaking oor tuberkulosis gedoen. Magda Kamfer, maatskaplike hulpwerker van Kindersorg SA Riversdal het beklemtoon dat die kinders veilig moet wees en is daar ook op Vryheidsdag gefokus. “Die program het duidelik die hele gemeenskap se aandag getrek, omdat baie van die volwasse persone ook nadergestaan het om na die program te luister,” vertel Shahida Filander van Kindersorg. Hulle bedank al die rolspelers, die Kwanokuthulagemeenskap, asook Hessequamunisipaliteit vir hul deelname en bydrae aan die vakansieprogram.