Hoër Landbouskool Oakdale
RUGBYTOERNOOI: Die o/19A- en B-rugbyspanne het tydens die afgelope Noord-Suid-rugbytoernooi in Pretoria voorwaar karakter gewys. Die toernooi wat vanaf 27 April tot 1 Mei deur die Afrikaanse Hoër Seunskool (Affies) in Pretoria aangebied is, het menige rugbyliefhebber hoendervel laat kry.
Deelnemende spanne van meer as 20 top hoërskole regoor die land het kragte op die rugbyveld gemeet. In hul eerste kragmeting het Oakdale se o/19A-span tydens die hoofwedstryd van die eerste dag teen die gasheer Affies te staan gekom. Dit was ‘n begeesterde en goedafgeronde Oakdalespan wat oorgehaal was om die opponente se onoorwonne status teen Oakdale te stuit. Die manne in die wit truie het Riversdallers se harte warm laat klop toe hulle die Bulle se naam hoog gehou het met hul eerste sege ooit oor Affies. Die eindtelling was 46-21.
Puntemakers
Drieë: Paul de Villiers, Enrique Arendse, Matthew Golden, Morné Els, Keagan Coerecius en Johan Balt. Doele: Neil le Roux (5). Strafdoele: Neil le Roux (2). Speler van die wedstryd: Neil le Roux.
Tydens hul tweede wedstryd teen Hoërskool Garsfontein op ‘n sopnat veld het die Bulle hul man gestaan en weer eens hul krag in SA-skolerugby ten toon gestel met ‘n wenvertoning van 41-17.
Puntemakers
Drieë: Erhard Lambrecht (2), Phillip Kleynhans (2), Johan Durr, Neil le Roux, Enrique Arendse. Doele: Neil le Roux (3). Speler van die wedstryd: Phillip Kleynhans.
In hul eerste wedstryd moes die o/19Bspan die knie teen Affies buig met ‘n telling van 43-20. Hul sege oor Garsfontein met ‘n telling van 28-5 was welgedaan. Tydens hierdie wedstryd is AJ van Vuuren as speler van die wedstryd aangewys.
Oakdale sien uit na ‘n genotvolle rugbyseisoen. Die seisoen skop eerskomende naweek af met wedstryde teen Hoërskool Stellenberg op hul tuisveld in die Kaap.