Susan tem die manne
Bounty Wildsverwerking se maandelikse borgdag is op Woensdag, 5 Mei ietwat ontwrig met Mosselbaai se onvoorspelbare weer. Die handjievol gholfspelers by Mosselbaai-gholfbaan wat deurgedruk het, het nogtans goeie punte behaal.
Susan Combrinck het die omstandighede puik hanteer en behaal ‘n skitterende 43 punte in die individuele stablefordkompetisie. Gert Pieterse laat hom nie maklik troef nie, maar Susan het gesorg dat Gert op 39 punte as naaswenner die stryd voltooi.
Drie spelers het op 36 punte hulle rondes afgesluit. Johan Buys het die beste gevaar in die uittel-proses en eindig in die derde plek. Noël Domingo en Roelof Combrinck was onderskeidelik vierde en vyfde.
Saterdag
Die dreigende onweer het Saterdag, 8 Mei die vroegoggend spelers ietwat gekortwiek. Met die weer wat geleidelik opgeklaar het, het ‘n hele klomp spelers die baan betree.
Jaco Groenewald (voorgee 8) het sy talente ten toon gestel en op 38 punte was hy ‘n gewilde wenner van die individuele s ta bl e f o r d kompetisie. Die altyd blymoedige Chris Brits het ook tande gewys en op 37 punte word hy as naaswenner gekroon nadat hy die uittel teen Pine Pienaar gewen het.
Die bestendige Hilton Duminy het op 36 punte die vierde plek ingeneem en Pieter Steenkamp se 35 punte het aan hom die vyfde plek besorg. Die Winter-uitklopkompetisie vorder fluks, maar daar is nog ‘n klomp spelers wat die eerste ronde moet voltooi.