Lente is hier en die gholfstokke gaan swaai
Gedurende Augustus het ons min reën, snerpende koue en sterk wind beleef. Uit die aard van die saak het dit ‘n beduidende invloed op ons aantal rondtes gholf by die Mosselbaai-gholfklub gehad. Ten spyte van die genoemde weersomstandighede het ons steeds oor die 3 000 rondtes aangeteken. Dit is voorwaar merkwaardig.
Met die lente wat aangebreek het en die dae wat geleidelik langer word, is ons optimisties dat oud en jonk nou weer gereeld sal kom stokke swaai. Die sakemanne het Augustus afgesluit met hulle gebruiklike en gewilde borgdag. Die gekombineerde Stablefordkompetisie het weer eens gesorg vir strawwe mededinding.
Chris van den Berg en André Zeelie het met bestendige spel hulle bors voor gekry op pad doellyn toe en het geseëvier met ‘n uitmuntende telling van 74 punte. Wynand Stander en Heinrich Matthee het hulle verwoed teëgesit en was gewilde naaswenners op 73 punte. Twee manne wat lanklaas die rooi tapyt betree het, Malan Barnard en Pine Pienaar, het met 71 punte die derde plek ingeneem. Die vierde en vyfde plekke kon eers na die uittel bepaal word en hier het Chris Barnard en Gerald Glover die oorhand gekry. Waldo Vorster en Stefanus Cronjé op 69 punte het die vyfde plek ingeneem. Dankie aan al die sakemanne vir ‘n vreugdevolle dag.
Saterdag
Ten spyte van die rugby-uitsendings het daar nog steeds 144 spelers op Saterdag, 3 September kom aantree vir die beterbal stablefordkompetisie. Guy Wiltgen en Michelle Landman was behoorlik op hulle stukke en verower die eerste prys op 47 punte. Kort op hulle hakke was Talvin Schultz en sy spookmaat op 46 punte.
Heinrich Matthee wat deesdae prominent onder die voorlopers is, het saam met Stephen le Roux op 46 punte die derde plek op die podium ingeneem. Die volgende spelers het ook in die heerlike vleispryse gedeel: Leon Writes en Louis Rossel (45 punte), asook Adriaan Maarschalk en Gys Wilson (44 punte).
Lede moet nou reeds ‘n aantekening maak dat ons klub se jaarlikse algemene vergadering geskeduleer is om op Woensdag, 28 September in die klubhuis plaas te vind.