Geen teken van sweeftuig nie
Die soektog na 'n gemotoriseerde sweeftuig wat na bewering Maandagoggend, 19 September net voor 07:00 in die water naby die strand in Reebok geval het, is voorlopig afgelas.
Plaaslike reddingsdienste is kort na 07:00 na die toneel by Kusweg, Reebok, ontbied, nadat ‘n inwoner die NSRI in Mosselbaai ontbied het.
Volgens 'n woordvoerder van die NSRI, beweer die inwoner hy het ‘n gemotoriseerde sweeftuig 'n paar keer sien sirkel terwyl dit al hoe nader na die see-oppervlak beweeg het. Die sweeftuig het toe in die water geval. Reddingspanne het sedert vroeg Maandagoggend 'n grootskaalse soektog met bote, 'n helikopter en later 'n vastevlerk vliegtuig uitgevoer.
'n Spesialis hommeltuig-eenheid van die Metrodienste in Kaapstad het later by die soektog aangesluit, maar teen laatmiddag, was daar nog geen teken van 'n sweeftuig, wrakstukke of die beweerde vermiste vlieënier nie. Daar is vroeg Dinsdagoggend besluit om die soektog af te las.
Volgens Richard Botha, bestuurder Metro Mediese Reddingsdienste, sal die ondersoek voortgaan indien enige nuwe inligting wat dui op 'n vermiste persoon na vore kom. Botha het ook gevra dat indien enige iemand wrakstukke of materiaal op die strande in die gebied vind, hulle dit sal aanmeld.
Die Suid-Afrikaanse Polisiediens het al die punte geïdentifiseer waar sweeftuig-vlieëniers gewoonlik parkeer en dit gefynkam, maar kon tot dusver ook nie iets daar opspoor nie. Die kommunikasiebeampte van die GrootBrakriver-polisiestasie, sers Lauriane Botha, het weer 'n beroep op die publiek gedoen om met enige inligting na vore te kom wat die ondersoek na die beweerde vermiste sweeftuigvlieënier, kan help. Sersant Botha kan op 082 552 1682 gekontak word.