Polisie waarsku teen bedrog
Die speurtak van die Da Gamaskoppolisiestasie het onlangs by 'n winkelsentrum pamflette uitgedeel waarin hulle wenke met die publiek deel oor die gevare van bedrog. Die optrede volg na herhaalde klagtes wat deur inwoners by die Da Gamaskoppolisiestasie aanhangig gemaak is omdat hulle duisende rande tydens bedrogslenters verloor het.Die speurders waarsku inwoners om versigtig te wees vir enige aankope wat aanlyn gedoen word. Volgens die polisie is dit die tendens dat misdadigers 'n wanvoorstelling aan hul slagoffers maak.
Wenke
Wees bedag vir items wat te koop aangebied word en dalk nie bestaan nie
Verskeie items word aangebied wat mense impulsief koop, soos byvoorbeeld oulike hondjies - moenie daarvoor val nie.
As iets te goed klink om waar te wees, is dit heel waarskynlik so.
Wanneer iets baie goedkoop is, wees uiters versigtig.
Wanneer iemand nie persoonlik gekontak kan word en die aanbod nie nagevors kan word nie, behoort dit ‘n rooi lig te wees.
Die item wat te koop aangebied word, behoort ten alle tye besigtig te kan word. Indien dit in ‘n ander dorp is, kan vriende of familie gevra word om dit te besigtig alvorens die geld oorbetaal word. Tye laat dit nie meer toe om enige item te koop sonder besigtiging of navorsing nie.
Gebruik betroubare webtuistes wanneer die internet gebruik word om items wat te koop aangebied word, aanlyn te koop.
Webtuistes
Wanneer 'n webtuiste besoek word, stel dit die slagoffer in gevaar dat by rekening of e-pos deur ‘n kuberkraker ingebreek word en persoonlike inligting sodoende verkry word.
Sorg dat enige webtuiste wat besoek word, veilig is en begin met: HTTPS in plaas van HTTP. Die S staan vir secure wat beteken die webtuiste is veilig
Moet nooit op versoek 'n PIN of OTPnommer in enige boodskap aan iemand vreemd bekend maak nie.