Bekende Groot Brak-inwoner ontsteld oor polisie-optrede
Elsa Davids en haar geliefde hond, Seuz, al stappende deur Groot-Brakrivier se strate is 'n bekende gesig in die omgewing. Elsa wat reeds 20 jaar in die gebied bly en dikwels gaan stap, is Sondag, 22 Januarie ongeveer 07:30 deur 'n straatloper in Langstraat voor die polisiekantoor verbaal aangeval en in krutaal toegesnou en gedreig dat hy haar gaan verkrag.
Sy vertel: "Die man het eers aan die anderkant van die pad geloop en toe oorgekom en my van agter gegryp. Ek het losgeruk en vir Seuz laat los." Volgens Elsa, het die man by die N2 brug opgehardloop en vir haar en Seuz van daar met klippe bestook. Van die klippe het vir Seuz getref. Elsa wat vreesbevange was, het die polisiekantoor geskakel, maar nadat daar nie antwoord was nie, het Suiderkruis Sekuriteit haar te hulp gesnel.
Elsa is ontsteld en kwaad oor die manier hoe sy behandel is deur van die GrootBrakrivier-polisielede en die ondervragingsproses wat sy moes deurgaan. "Daar het drie fietsryers verbygery en ek het skielik vinnige voetstappe agter my gehoor.
Hy het my toe van agter aan my skouer geruk. Ek het hom al voorheen gesien en het hom herken aan sy klere, stap en sy stemtoon."
Geen empatie
Elsa is veral ontsteld oor die wyse waarop sy ondervra is. "Dit is asof ek die skuldige persoon was en moes bewys dat ek aangeval is. Daar was geen empatie vir my nie.
Ek was woedend gewees. My man is 26 jaar gelede voor my doodgeskiet en die hantering van my aanval het al die trauma weer na die oppervlak gebring.
Vroue moet voel dat hulle die reg het om oor sulke aanvalle te praat. Net deur vriendelik en empaties te wees tydens ondervraging sal alreeds 'n groot verskil maak."
Mossel Bay Advertiser het met die bevelvoerder van die Groot-Brakrivierpolisiestasie, kaptein Francois Henzen, gesels wat sy spyt uitgespreek het oor die aanval en die emosionele trauma wat Elsa ervaar het en ook met die ondervragingsproses. "Ongelukkig kan ons net 'n verdagte aankla en vervolg as hy duidelik uitgeken word.
Ons het die gemeenskap se hulp nodig om
ons oë en ore te wees.
Ons hoop dat hierdie insident mense sal aanspoor om meer waaksaam te wees en eerder in groepe te beweeg."
Henzen verduidelik dat die polisiekantoor datalyne het en nie telefoonlyne nie. "Beurtkrag het 'n invloed op die werking van die lyne.
Die publiek moet asseblief die sektornommer skakel by 082 522 2807.