Shift wil dinge skuif vir jeug
Die jeug is die toekoms en die toekoms begin vandag.
Dit was die boodskap van Memory Booysen, burgemeester van die Tuinroete-distriksmunisipaliteit, toe hy verlede Donderdag, 26 Januarie, as geleentheidspreker by die bekendstelling van 'n nuwe inisiatief om jeugbemagtiging te bevorder, opgetree het. Dit staan as Shift Entrepreneurs, bekend.
Dennis Farrell, sakeleier en die dryfkrag agter Business Café, het as fasiliteerder opgetree.
Die geleentheid is bygewoon deur onder meer Booysen, die voorsitter van Shift, Des-lie van Wyk en die ondervoorsitter, Khanyi Hlungwane. 'n Groep jong sakelui en professionele mense was ook teenwoordig.
Booysen het gesê baie verandering in Suid-Afrika is nodig. Dit sluit in verandering by sakeondernemings. Ondervinding kan nie gekoop word nie en die ouer grade moet help om hul kennis oor te dra.
Volgens Booysen is dit frustrerend dat Suid-Afrika in 'n gemors is. Die rede daarvoor is dat die politiek in die land in 'n gemors is.
Vir die jeug om te kan floreer, moet die owerhede byvoorbeeld aansoeke en sonerings vir sakeondernemings goedkeur. Die meerderheid van die bevolking in Suid-Afrika is die jeug.
Mense wil nie meer belasting betaal nie, want hulle vertrou nie meer die politici met hul geld nie. Suid-Afrika het 'n nuwe bedeling nodig. 'n Nuwe ingesteldheid. Hy het onderneem om met sy kollegas in ander munisipaliteite te praat om deel te word van die inisiatief.
Hy het gesê die inisiatief is 'n stap in die regte rigting.
Die jeug behoort 'n belangrike rol te speel in die ekonomie.
Farrel het gesê Shift is 'n beweging waardeur die jeug bemagtiging aanneem. "Jong sakelui van George en die Tuinroete is betrokke. Die jeug word genooi om betrokke te raak."
Die ouer garde behoort te belê in die sakeleiers van môre. Dis belangrik om nie net vertroue te bou in die sakesektor nie, maar ook in die gemeenskap. Mense moet saamwerk en dit moet oplossings-gedrewe wees.
Van Wyk het Maandag gesê die terugvoering wat hulle sover gekry het, is baie positief. Verskeie mense het reeds aangesluit en daar is beslis behoefte vir so iets. "Ons werk om geleenthede te skep om mense te betrek."
'n Kultuur word gevestig wat noodwendig jonger mense trek. Hy het benadruk hulle wil jong entrepreneurs en aspirant entrepreneurs betrokke kry. Een van die fokuspunte is om werksgeleenthede vir die jeug te skep.