Arende gassprekers by Sakekamerfunksie
Mosselbaai Sakekamer se eerste maandelikse byeenkoms van 2023 het verlede week by die Van Riebeeckstadion plaasgevind waar die SWD Arende van die gaste was en lede van hulle bestuur as gassprekers opgetree het.
Die SWD Arende het Woensdag, 25 Januarie 'n opwarmingswedstryd teen Griekwas gespeel en die SWD-bestuur het die geleentheid gebruik om die ondersteuning van die plaaslike rugbyentoesiaste aan te moedig deur die wedstryd in Mosselbaai aan te bied. Die SWD-Arende se rugbyspan het ook die Sakekamer-geleentheid bygewoon met die president, Ben Brinkhuis en die afrigter, Anton Moolman wat hul toekomsplanne vir die span bekend gemaak het. Moolman was vir drie jaar 'n afrigter in Frankryk voordat hy by die SWD Arende aangesluit het. "Ons doelwit is om in 2025 in die Curriebekerkompetisie te speel en groot spanne te kry om in ons streek te kom speel. Ons het die publiek se ondersteuning nodig om die Arende te ondersteun en te kry waar hulle moet wees."
Investering
Mosselbaai Munisipaliteit se direkteur van beplanning en ekonomiese ontwikkeling, Carel Venter, het bekend gemaak dat 20 luukse passasierskepe hierdie seisoen by die hawe gaan aandoen. Met sowat 800 passasiers wat gemiddeld per boot aan wal kom, bly 150 in die sakekern van Mosselbaai agter en 650 gaan op bustoere na onder andere wildsplase en die Kango Grotte buite Oudtshoorn. Dit beteken sowat 3 000 besoekers wat gemiddeld
R1 000 in Mosselbaai self spandeer, R3 miljoen se inkomste na die gebied bring. Die res van die besoekers wat omliggende gebiede besoek, beteken 'n beraamde investering van R14.4 miljoen in die streek.
Die Mosselbaai se hawe is ook nou 'n "Port of Entry" wat beteken dat buitelandse besoekers die land hier kan inkom, en nie net deur Kaapstad se doeane nie. Venter het die hoop uitgespreek dat die Hawe-owerhede die infrastruktuur sal opknap om die groot aantal besoekers te akkommodeer. 'n Nuwe wildsplaas, Bon Game, is bekend gestel wat die eerste Hovercraft in die omgewing gaan bedryf. Die kos wat deur Salt & Copper verskaf is, was keurig, gesond en vingerlek-lekker.