Moenie oumotorskou misloop

Hulle koop en verkoop nie net motors nie – hul dra ook die George-oumotorskou! Toe die 25ste bestaansjaar verlede jaar gevier is, het die silwer jubileum-uitgawe van die George-oumotorskou (GOCS)

2 000 motors van 'n asemrowende verskeidenheid oor twee dae vertoon. Nie minder nie as 8 000 besoekers het na HTS Eden opgeruk vir hul deel van die motoraksie en vanjaar se geleentheid op 11 en 12 Februarie beloof 'n ervaring wat geen selfrespekterende petrolkop sou waag om mis te loop nie.

Die datum vir 2023 se oumotorskou, wat as 'n jaarlikse spogparade van die Suid-Kaap-oumotorklub dien, is verlede November tydens 'n mediabekendstelling by Protea Hotel King George aangekondig. Liefhebbers van veteraanmotors moet nou die tweede naweek in Februarie op hul kalenders aanteken, wanneer die skouterrein in Langstraat weer sal wemel van motors, motorfietse, trekkers en nog vele meer.

WeBuyCars 2023 borg

WeBuyCars is die voorbokvennoot van vanjaar se George-oumotorskou. Hoofbemarkingsbeampte Rikus Blomerus sê die maatskappy spog met baie uitstaande eienskappe maar die beste van alles is die kultuur van en die personeel van hierdie ontluikende nasionale onderneming. Kom deel u passie vir motors

Kom deel die passie vir motors saam met die Suid-Kaap-oumotorklub en WeBuyCars wanneer vanjaar se Georgeoumotorskou met 'n spesiale fokus op Italiaanse motors, byeenkom op 11 en 12 Februarie.

Deelnemers en stalletjiehouers moet kennis neem dat die enigste manier om te registreer, is deur www.scocc.co.za.

Besoek die GOCS Facebook-blad vir besonderhede en stuur 'n e-pos aan dyndev@mweb.co.za of skakel 082 457 5675 met navrae. Neem asseblief kennis dat parkering by Carpe Diem Skool beskikbaar sal wees teen R20 per motor.

Lees meer by www.mosselbayadvertiser. com