Kaptein Henzen lei van voor
Die Groot-Brakrivier-polisiestasie het sedert 1 Desember verlede jaar 'n nuwe bevelvoerder wie se missie dit is om beter samewerking tussen die polisielede, buurtwagte en die publiek te bewerkstellig. Hy streef ook daarna om gelukkige polisielede in die kantoor te hê wat passievol is oor hulle beroep.
Ek het kaptein Francois Henzen die eerste keer ontmoet toe hy op Nuwejaarsdag op die toneel was waar klein Amira Kloupas verdrink het. Maandagoggend het hy moeg gelyk, nadat hy en sy span Sondagoggend vroeg uit is en kilometers deur modder moes loop na 'n plaas in die Friemersheim omgewing waar 'n jong meisie se liggaam gevind is. Op my opmerking dat daar die afgelope tyd heelwat moorde was, het Henzen trots geantwoord dat dié betrokke oortreders almal gevang en gearresteer is.
Kaptein Francois Henzen (48) en sy vrou, Lynette het hulself ses jaar gelede in die Mosselbaai-omgewing gevestig. Hy was vir 14 jaar by die Openbare Orde Polisieeenheid (POP) aan die Oos-Rand betrokke en het daarna vir agt jaar taktiese opleiding gedoen. Sedert hulle in Mosselbaai is, het hy by die Da Gamaskop Cluster diens gedoen.
Doelwitte
Henzen se doelwitte vir die GrootBrakrivier-polisiestasie is om die administratiewe prosesse weer op datum te kry en verhoudings tussen die gemeenskap, die buurtwagte en die polisie te verbeter. "Ons grootste uitdaging is dat die area wyd en verspreid is en dat misdaad toeneem weens meer boubedrywighede wat nuwe mense na die area bring. Ons verwelkom die groter wordende rol wat die buurtwagte en hul gebruik van tegnologie bring om die
area te beveilig en oortreders vas te trek. Ons kan nie ons werk doen sonder die publiek se hulp nie."
Henzen beklemtoon dat hulle veral huisinbrake wil verminder. Hy vra dat die publiek dadelik iets aanmeld wat verdag voorkom of as iemand gesteelde goedere probeer verkoop. "Ons beskikbare mannekrag is nie genoeg om misdaad doeltreffend te bekamp nie. Ons het net een diensvoertuig per skof beskikbaar en het ten minste nog twee voertuie nodig om patrollies te doen."
Henzen vra dat die mense in die omgewing betrokke raak as reserviste. Die telefoonlyne by die kantoor is 'n groot kopseer, omdat dit datalyne is en deur beurtkrag beïnvloed word. "Kontak asseblief die sektornommer by 082 522 2807."
Henzen vertel dat hy daarvan hou om in die garage rond te peuter en houtwerk te doen. Hy sê hy probeer van die wal af visvang, maar dat hy nie baie sukses daarmee het nie. Die Henzens het 'n seun en 'n dogter wat reeds uit die huis is.