Interprovinsiale tweekamp die naweek op Oudtshoorn
Vanjaar se interprovinsiale tweekampbyeenkoms word môre, Saterdag 4 Februarie op Oudtshoorn aangebied.
Dit is naas die SA tweekampkampioenskappe, die grootste tweekampbyeenkoms in Suid-Afrika.
Dit sal ook die 33ste Highgate-byeenkoms wees wat soos gewoonlik deur Dave van der Walt georganiseer word - sy heel laaste een.
Sowat 551 atlete van agt provinsies sal aan hierdie byeenkoms deelneem. Die provinsies sluit in die WP, OP, Boland, KZN Grens, Griekwaland-Wes en Eden (SWD).
Volgens Van der Walt word daar vir die naweek, tweekamp uit die boonste rakke verwag in aanloop tot die SA kampioenskappe wat op 31 Maart en 1 April in Stellenbosch aangebied word.
Van die eregaste wat reeds aangedui het dat hulle teenwoordig gaan wees, is die Wes-Kaapse minister van kultuursake en sport, Anroux Marais, die uitvoerende burgemeester van Oudtshoorn (Chris McPherson), die voorsitter van die Edensportraad (Desmond Speelman), Blackie Swart (president van SA tweekamp) en lede van SA tweekampbestuur sowel as die voorsitters van die provinsies.
Die verrigtinge neem alreeds vanaand,
Vrydagaand, 3 Februarie, in aanvang met die spanbestuurdersfunksie by Highgatevolstruisplaas. Die amptelike opening is môre vanaf 07:30 by die De Jagersportkompleks waarna daar na die NA Smitswembad beweeg sal word.
Die galafunksie en die medaljeparade sal later die aand by die Highgate-volstruisplaas plaasvind.
Die aanbieding van vanjaar se interprovinsiale tweekamp word ondersteun en bygestaan deur WP en Boland asook beamptes van die ander provinsies.