Misdaad aan die toeneem
Mosselbaai en sy onmiddellike omgewing is stadig maar seker besig om te verander van die eens veilige hawe vir sy inwoners, na 'n misdaad paradys. Die afgelope klompie maande word inwoners geteister met gereelde inbrake, wat gewoonlik beperk was tot net enkele gevalle. Ernstige misdade is steeds in die minderheid, maar ook dit is besig om stadig maar seker toe te neem.
Drie verdagtes is vasgetrek en het op Vrydag, 8 September, in die Mosselbaai Landdroshof verskyn op 'n aanklag van kaping van 'n motorvoertuig ná 'n insident wat op Dinsdag, 5 September, in Marshstraat, Mosselbaai, plaasgevind het. Dit was naby die brug by die Super Spar in Da Nova. Die omstandighede word ondersoek, maar die voorlopige ondersoek dui daarop dat die slagoffer om 01:00 by 'n rooi verkeerslig gestop het. Volgens 'n verklaring het drie onbekende mans na die voertuig beweeg, waarvan een persoon na bewering gewapen was met 'n vuurwapen.
Volgens adjudant offisier Kappie Kapp, polisiewoordvoerder, is die slagoffer en sy passasier uit die voertuig gedwing en het die verdagtes die voertuig geneem. 'n Goed-gekoördineerde soektog het gevolg, wat gelei het tot die opsporing van die voertuig in Alhofrylaan, en die arrestasie van die drie verdagtes. Daar is ook beslag gelê op 'n nagemaakte vuurwapen. Die bestuur van die Mosselbaai polisie het die pogings van die sigbare polisiëringseenheid, misdaadvoorkoming, Mosselbaai speurders en die voertuigdiefstal-eenheid van George, aangeprys vir die werk wat ingesit is om die drie verdagtes so gou vas te trek.
'n Toyota Prado wat Sondag, 10 September, omstreeks 19:30 in Blandstraat by Point Village na bewering gesteel is, het kort daarna naby De Bakke in Louis Fourieweg gerol. Die voertuig is verlate gevind en die polisie ondersoek die voorval.
Tussen 4 en 8 September is nog ernstige misdade by die Mosselbaai polisie aangemeld. Kapp het ook bevestig dat verskeie inbrake in sektor twee in dieselfde tyd plaasgevind het. Drie inbrake by Benevolent Park asook 'n inbraak in Ryk Tulbachstraat, Da Nova, het ook voorgekom.
'n Voorval van diefstal uit 'n motorvoertuig en 'n poging tot diefstal van 'n motorvoertuig is in Hibiskuslaan, Uitbreiding 6 en Malvaweg in Tarka aangemeld. Reebok, Die Heuwels en omliggende dele loop ook deur met inbrake. Twee inbrake het die afgelope weke net in Grysboklaan, Reebok voorgekom.
Die afgelope klompie maande word inwoners geteister met gereelde inbrake, wat gewoonlik beperk was tot net enkele gevalle.