Die baai word boomryker
Mosselbaai word by die dag meer boomryk. Altesaam 2 601 bome is die afgelope jaar in die gebied geplant. Dit volg op die Mosselbaaimunisipaliteit se vergroeningsplan wat goed gekeur is. Vir die volgende vyf jaar sal minstens 5 150 bome in die gebied geplant word.
Die Mosselbaai Begrafplaas het onlang nog bome bygekry en daar sal eersdaags bykans 300 bome in Sonskynvallei geplant word.
Die departement visserye, bosbou en omgewingsake het ongeveer 2 000 bome geskenk.
Al die bome is inheems en staan reeds sterk op ongeveer 2m. Daar is ook ‘n hoeveelheid vrugtebome ingesluit, soos lemoen-, suurlemoen- en vyebome.
Die munisipaliteit se parkespan het op 5 Augustus reeds begin om die bome te plant en volgens beplanning sal daar teen die einde September sowat 1 500 van die geskenkte bome reeds geplant wees.
Dit sluit die hele munisipale gebied in. Van die bome word deur ‘n kontrakteur geplant, wat spesifiek vir hierdie doel deur die parkespan se kundiges opgelei word. Die munisipaliteit in samewerking met die kontrakteur neem dan verantwoordelikheid vir die natlei van die aangeplante bome.
Ongeveer 300 bome sal in die Mosselbaai Begraafplaas geplant word. Dit bring die totaal sedert Julie verlede jaar op ongeveer 1 100 in die Mosselbaai Begraafplaas te staan.
Bring jou steggie
“Ons het ‘n opwindende vergroeningsprojek waarin die gemeenskap op ‘n besonderse manier betrokke kan raak. Ons wil baie graag ‘n spekboomdoolhof in ‘n park in Heiderand tot stand bring. Hiervoor reken ons dat ons ten minste 6 000 spekboomsteggies benodig gaan word,” sê Elize Nell, direkteur van gemeenskapsdienste.
“Ons het ‘n kweekhuis in die Harry Giddeypark en het al begin om steggies te kweek. Hierdie projek het vroeër in die jaar ‘n hupstoot gekry toe Laerskool Park se landsdiensleerders ‘n paar honderd steggies gegee het en terselfdertyd geleer het hoe om dit te plant en te kweek. Ons het so ongeveer 1 000 steggies in die kweekhuis.”
Lede van die publiek is welkom om enige soort spekboomsteggie gedurende September by een van die volgende twee plekke af te gee:
By die Harry Giddeypark, waar die dieregedeelte is.
By die brandweer se kantore op GrootBrakrivier.
Indien daar persone is wat groot hoeveelhede steggies het, kan hulle met die munisipaliteit kontak maak om dit te kom afhaal. Dieselfde sou geld indien die skenking uit die landelike areas, soos byvoorbeeld Friemersheim of Herbertsdale gedoen word, en die skenker dit nie by een van die twee aflaaipunte kan kry nie.
Die steggies moet 30cm lank wees en dit kan enige soort spekboom wees.