Allerlei komplikasies kan met varkgriep gepaardgaan

HESSEQUA - Almal het die afgelope tyd in die media gehoor van varkgriep, ook bekend as H1N1.

Die naam is afkomstig van 'n griepvirus by varke. Mense kan varkgriep opdoen, net soos enige ander griepvirusse.

Die H1N1-virus, of varkgriep waarna hier verwys word, vorm deel van die groter influenza virus-groep.

Die virus word as deel van die seisoenale griep beskou. Daar word nie roetine toetse op mense met griep gedoen om die spesifieke virus te bepaal nie, net die simptome word behandel. Sou 'n pasiënt baie siek wees en na George-hospitaal verwys word, is daar ‘n moontlikheid vir toetsing.

Die virus het meer uitgesproke gevolge in sensitiewe pasiënte soos immuunonderdrukte pasiënte (kankerpasiënte, mense met MIV-infeksies, ensovoorts) ouer mense en jong kinders om ‘n paar te noem.

Onder normale omstandighede besmet varkgriep nie mense nie, maar dit is wel moontlik.

Die infeksie kan verskillende simptome veroorsaak. Sommige van hierdie simptome is soortgelyk aan ander soorte griep, maar omdat die behandeling verskil, is 'n behoorlike diagnose, wat toetsing insluit, die sleutel.

Simptome

Skielike koors.

Akute boonste ligweg simptome: droë hoes, seer keel.

Algemene simptome: moegheid, hoofpyn, spierpyn en lyfpyn, koue koors.

Sommige mense mag naar wees en diarree hê, alhoewel dit meer algemeen is by kinders as by volwassenes.

Komplikasies

Daar is 'n paar komplikasies wat verband hou met die H1N1-virus, veral onder kinders, bejaardes en swanger vroue. Diegene met asma of ander chroniese respiratoriese siektes kan langdurige simptome ervaar. Dit is ook moontlik dat varkgriep in longontsteking kan oorgaan, veral vir mense met chroniese toestande.

Longontsteking kan uiters gevaarlik wees en kan soms tot hospitalisasie lei. Bejaardes en mense met chroniese siektes loop 'n groter risiko vir asemhalingsversaking, wat die longfunksie kan benadeel en kan lei tot verminderde suurstofvlakke.

Voorkoming:

Bly by die huis en beperk kontak met ander mense waar moontlik.

Maak jou mond en neus met ‘n snesie toe as jy hoes of nies en gooi dit in ‘n asblik.

Was jou hande gereeld met seep of alkohol-gebaseerde handwas, veral nadat jy gehoes, genies of jou neus geblaas het. Jy kan ook ‘n masker dra.

Die beste beskerming is om te gaan vir die griepinspuiting wat gratis is by alle publieke gesondheidsorgfasiliteit. Dit bied beskerming en sal maak dat simptome ligter is indien jy wel griep kry.

Volgens die Wes-Kaapse regering is daar tot dusver nog geen gevalle of vermoede van H1N1 in die Hessequa-streek aangemeld nie.